অসমৰ যোৰহাটৰ কাজিৰঙা বিশ্ববিদ্যালয়ত প্ৰয়াত গায়ক জুবিন গাৰ্গক লৈ এগৰাকী নগা ছাত্ৰই কৰা মন্তব্যক গৰিহণা দিছে নাগালেণ্ডৰ মন্ত্ৰী টেমজেন ইমনা আলঙে।
কি হৈছিল ঘটনাটো
এটা আগশাৰীৰ সংবাদ সংস্থাৰ মতে, ছাত্ৰজনে প্ৰয়াত শিল্পীগৰাকীৰ বিৰুদ্ধে গালি-গালাজ কৰাৰ অভিযোগ উত্থাপন হৈছে।
সংবাদ মাধ্যমৰ সৈতে হোৱা কথা-বতৰাত টেমজেন ইমনা আলঙে জুবিনক কেৱল অসমৰেই নহয়, সমগ্ৰ উত্তৰ-পূব আৰু ভাৰতৰ গৌৰৱ বুলি অভিহিত কৰে। তেওঁ বিশ্ববিদ্যালয়খনৰ সকলো নগা ছাত্ৰ-ছাত্ৰী সুৰক্ষিত বুলিও আশ্বাস দিয়ে।
‘এইটো এটা অতি স্পৰ্শকাতৰ বিষয়। আমাৰ নিজৰ ল’ৰা এজনে যেতিয়া এনে ভুল কৰে, সেয়া জানি হওক বা অজ্ঞাতে হওক, প্ৰথম কথা, খঙত বা সুখত এনে বক্তব্য দিয়া উচিত নহয়। সেয়া সম্পূৰ্ণ ভুল’, এই মন্তব্য আলঙৰ।
মন্ত্ৰীগৰাকীয়ে লগতে কয়, ‘কাজিৰঙা বিশ্ববিদ্যালয়ৰ ৩০০-৪০০ৰো অধিক নগা ছাত্ৰ-ছাত্ৰী নিৰাপদ, আৰু এই ঘটনাটোৰ বাহিৰে কোনো অশুভ কাণ্ড সংঘটিত হোৱা নাই। খঙত হওক বা ধেমালিতে হওক এনে বক্তব্য ভুল আৰু সংবেদনহীন। জুবিন গাৰ্গ কেৱল অসমৰেই নহয়, সমগ্ৰ উত্তৰ-পূব আৰু ভাৰতৰো গৌৰৱ আছিল। আমাৰ ল’ৰাটোৱে যি কথা কৈছে তাৰ বাবে আমি দুখী।’
সমগ্ৰ অসমৰ অনুৰাগীসকলে জুবিন গাৰ্গক শ্ৰদ্ধাঞ্জলি জ্ঞাপন কৰি থকা এই স্পৰ্শকাতৰ সময়ত ছ’চিয়েল মিডিয়াত আৱেগিক মন্তব্যৰ পৰা আঁতৰি থাকিবলৈও তেওঁ ছাত্ৰ-ছাত্ৰীসকলক আহ্বান জনায়।
কাজিৰঙা বিশ্ববিদ্যালয়ত কি হৈছিল?
কাজিৰঙা বিশ্ববিদ্যালয়ত শনিবাৰে নিশা প্ৰায় ৮:৩০ বজাত নাগালেণ্ডৰ এগৰাকী বি টেক চিভিল ইঞ্জিনিয়াৰিঙৰ ছাত্ৰই প্ৰয়াত গায়ক জুবিন গাৰ্গৰ প্ৰতি কৰা অসন্মানজনক মন্তব্যৰ পৰাই বিতৰ্ক আৰম্ভ হোৱা বুলি জানিব পৰা গৈছে।
এটা ভাইৰেল ভিডিঅ’ত ছাত্ৰজনে কোৱা শুনা গৈছিল, ‘কোনে গুৰুত্ব দিয়ে?’ এই কথা কোৱাৰ লগে লগে কোঠাটোত উপস্থিত থকা আন দুই এজনে প্ৰত্যুত্তৰ দি কয়, ‘আপুনি কি ক’ব বিচাৰিছে, ‘কোনে গুৰুত্ব দিয়ে?’ হেৰা, জুবিন দাক অসন্মান নকৰিবা।’
এইদৰে হকা বাধা দিয়াৰ পিছতো ছাত্ৰজনে যুক্তি দি কয়, ‘কুইনৰ মৃত্যুৰ সময়ত আপুনি গুৰুত্ব দিছিল নেকি? তেনেকুৱা নহ’ব। কোন সেই …(আপত্তিজনক শব্দ) জুবিন গাৰ্গ?’
