জম্মু-কাশ্মীৰৰ পেহেলগামত সংঘটিত হোৱা নাৰকীয় সন্ত্ৰাসবাদী আক্ৰমণৰ ঠিক এমাহ পিছত প্ৰধানমন্ত্ৰী নৰেন্দ্ৰ মোদীয়ে পুনৰবাৰ সন্ত্ৰাসবাদৰ বিৰুদ্ধে সৰৱ হৈ পৰা পৰিলক্ষিত হৈছে। ৰাজস্থানৰ ভূমিৰ পৰা প্ৰধানমন্ত্ৰী মোদীয়ে বিশ্ববাসীক এনে এক স্পষ্ট বাৰ্তা দিয়ে যিটো পাকিস্তানে কেতিয়াও পাহৰিব নোৱাৰে।
প্ৰধানমন্ত্ৰী মোদীয়ে আগ্ৰাসী সুৰত সন্ত্ৰাসবাদৰ বিৰুদ্ধে চলোৱা অপাৰেশ্যন সিন্দূৰৰ বিষয়ে উল্লেখ কৰে। স্পষ্ট বাৰ্তা প্ৰদান কৰি প্ৰধানমন্ত্ৰী মোদীয়ে কয় যে সিন্দূৰ বাৰুদলৈ পৰিণত হ’লে কি হয় সেয়া বিশ্বই দেখিছে।
১. পেহেলগাম আক্ৰমণ সন্দৰ্ভত প্ৰধানমন্ত্ৰী মোদীয়ে কয়, ‘২২ তাৰিখৰ আক্ৰমণৰ প্ৰত্যুত্তৰত আমি ২২ মিনিটতে সন্ত্ৰাসবাদীৰ ৯টা সৰ্ববৃহত ঘাটী ধ্বংস কৰি দিছো। চৰকাৰে তিনিওটা সেনাক পূৰ্ণ কৰ্তৃত্ব প্ৰদান কৰাৰ পিছতে সেনাই পাকিস্তানক আঁঠু ল’বলৈ বাধ্য কৰাইছিল।’
২. প্ৰধানমন্ত্ৰী মোদীয়ে কয়, ‘দেশে সংকল্প লৈছিল যে সন্ত্ৰাসবাদীক নিঃশেষ কৰা হ’ব আৰু মই ক’বলৈ পাই সুখী যে কল্পনা কৰাতকৈও ডাঙৰ পদক্ষেপ গ্ৰহণ কৰা হৈছিল। তেওঁ কয়, ‘সন্ত্ৰাসবাদৰ সৈতে মোকাবিলা কৰিবলৈ তিনিটা নীতিৰ সিদ্ধান্ত লোৱা হৈছে – ১. ভাৰতত সন্ত্ৰাসবাদী আক্ৰমণ হ’লে উপযুক্ত উত্তৰ দিয়া হ’ব। সময় আমাৰ বাহিনীয়ে নিৰ্ধাৰণ কৰিব, পদ্ধতিও আমাৰ বাহিনীয়ে নিৰ্ধাৰণ কৰিব আৰু চৰ্তসমূহো আমাৰ হ’ব। ২. দ্বিতীয়তে ভাৰত পৰমাণু বোমাৰ ভাবুকিৰ বাবে ভয় নাখায়। ৩. তৃতীয়তে, সন্ত্ৰাসবাদৰ শীৰ্ষ নেতা আৰু সন্ত্ৰাসবাদীক পৃষ্ঠপোষকতা কৰা চৰকাৰক পৃথক বুলি নাভাবো, আমি তেওঁলোকক এক বুলি গণ্য কৰিম।’
৩) প্ৰধানমন্ত্ৰী মোদীয়ে আৰু কয়, ‘সন্ত্ৰাসবাদীয়ে ধৰ্ম সুধি আমাৰ ভগ্নীসকলৰ কপাল উকা কৰিছিল। পেহেলগামত চলোৱা সেই গুলী ১৪০ কোটি দেশবাসীৰ হৃদয় বিন্ধিছিল।’
৪) তেওঁ আৰু কয়, ‘পাকিস্তানে এটা কথা পাহৰি গৈছে, এতিয়া ইয়াত ভাৰত মাতৃৰ সেৱক মোদী থিয় হৈ আছে। মোৰ মগজু শান্ত, শান্ত হৈয়ে থাকে, কিন্তু গৰম হ’লে ইয়াৰ পৰিণতি বহু বেয়া হ’ব। এতিয়া মোৰ ধমনীত তেজ নহয়, সিন্দূৰ বৈ আছে। প্ৰতিটো সন্ত্ৰাসবাদী আক্ৰমণৰ বাবে পাকিস্তানে উচিত মূল্য ভৰিব লাগিব আৰু এই মূল্য পাকিস্তানৰ সেনাই দিব লাগিব। পাকিস্তানৰ অৰ্থনীতিয়ে ইয়াৰ মূল্য ভৰিব।’
৫) ‘আজি আপোনালোকৰ আশীৰ্বাদ আৰু সেনাৰ সাহসিকতাৰে আমি সেই প্ৰতিশ্ৰুতি পূৰণ কৰিলোঁ। আমাৰ চৰকাৰ আৰু তিনিওটা সেনাই এনে চক্ৰবেহুৰ সৃষ্টি কৰিলে য’ত পাকিস্তানে আত্মসমৰ্পণ কৰিবলৈ বাধ্য হয়।’
উল্লেখ্য যে, আজি ৰাজস্থানৰ বিকানেৰত অনুষ্ঠিত এক চৰকাৰী অনুষ্ঠানত উপস্থিত থাকি প্ৰধানমন্ত্ৰী নৰেন্দ্ৰ মোদীয়ে বিভিন্ন প্ৰকল্পৰ শুভ উদ্বোধন কৰাৰ লগতে পাকিস্তানৰ বিৰুদ্ধে সৰৱ হৈ পৰা দেখা যায়।
