দেশত উদ্ভৱ হোৱা হিংসাত্মক পৰিস্থিতি আৰু তেওঁৰ অভ্যুত্থানৰ পিছত নেপালৰ প্ৰাক্তন প্ৰধানমন্ত্ৰী কে পি শৰ্মা অলিয়ে প্ৰথমবাৰৰ বাবে ৰাজহুৱা ভাষণ প্ৰদান কৰিছে।
২৭ ছেপ্টেম্বৰত প্ৰথমবাৰৰ বাবে ৰাজহুৱাভাৱে উপস্থিত হৈ তেওঁ নতুন জেন জেড প্ৰশাসনক সমালোচনা কৰে। নেপালৰ প্ৰাক্তন মুখ্য ন্যায়াধীশ সুশিলা কাৰ্কীৰ নেতৃত্বত চলি থকা অন্তৱৰ্তীকালীন চৰকাৰখনক জেন জেড চৰকাৰ বুলি উল্লেখ কৰে। এই অন্তৱৰ্তীকালীন চৰকাৰখন “নকল চৰকাৰ” বুলিও তেওঁ কয়।
তেওঁ কয় যে, এইখন জেন জেড চৰকাৰ, যিখন নেপাল সংবিধানৰ অনুসৰি গঠন হোৱা নাই বা ভোটদানৰ জৰিয়তে জনসাধাৰণে নিৰ্বাচিত কৰা হোৱা নাই। এই চৰকাৰখন হিংসা, অগ্নিসংযোগ, মাৰপিটৰ জৰিয়তে গঠন কৰা হৈছিল।
এই বৈঠকৰ সময়ত নেপালৰ প্ৰাক্তন প্ৰধানমন্ত্ৰী কে পি শৰ্মা অলিয়ে দেশখনৰ বৰ্তমানৰ নেতৃত্বৰ উদ্দেশ্যক লৈ প্ৰশ্ন উত্থাপন কৰে। তেওঁ কয় যে, নেপালৰ সাংবিধানিক আৰু গণতান্ত্ৰিক নীতি পুনৰুদ্ধাৰ কৰি ৰাজনৈতিক ক্ষমতা পুনৰুদ্ধাৰ কৰাৰ প্ৰয়োজনীয়তা আহি পৰিছে।
