নিউজিলেণ্ডৰ প্ৰতিভাৱান ক্ৰিকেটাৰ চাড জেছন ব’ৱেছে ৰচিছে ইতিহাস। লিষ্ট এ ক্ৰিকেটত দ্ৰুততম দ্বিশতক অৰ্জন কৰা বেটছমেন হিচাপে পৰিগণিত হৈছে চাড ব’ৱেছ। মাত্ৰ ১০৩টা বলত দ্বিশতক অৰ্জন কৰি লিষ্ট এ ক্ৰিকেটত বিশ্ব অভিলেখ গঢ়িবলৈ সক্ষম হৈছে চাড ব’ৱেছে।
কেণ্টাৰবেৰীৰ বেটছমেন চাড ব’ৱেছে অটাগোৰ বিৰুদ্ধে খেলখনত বিধ্বংসী বেটিং কৰি মাত্ৰ ১০৩টা বলত দ্বিশতক অৰ্জন কৰি ইতিহাসৰ সৃষ্টি কৰে। লিষ্ট এ ক্ৰিকেটত তেওঁ অষ্ট্ৰেলিয়াৰ ট্ৰেভিছ হেডৰ অভিলেখ ভংগ কৰে।
২০২১ চনত দক্ষিণ অষ্ট্ৰেলিয়াৰ হৈ কুইন্সলেণ্ডৰ বিৰুদ্ধে খেলখনত ১১৪টা বলত দ্বিশতক অৰ্জন কৰিছিল হেডে।
লিষ্ট এ ক্ৰিকেটৰ আটাইতকৈ দ্ৰুততম দ্বিশতক
চাড ব’ৱেছ – ১০৩ বল
ট্ৰেভিছ হেড – ১১৪ বল
এন জগদীসন – ১১৪ বল
হেগলি অ’ভেলত খেলা মেচখনত চাডে বিস্ফোৰক ইনিংছ খেলি ১১০টা বলত ২০৫ ৰান সংগ্ৰহ কৰে। য’ত তেওঁৰ ইনিংছত আছিল ২৭টা চাৰি আৰু ৭টা ছয়। চাড ব’ৱেছৰ ইনিংছৰ ভিত্তিত কেণ্টাৰবেৰীৰ দলটোৱে ৫০ অভাৰত ৩৪৩ ৰান সংগ্ৰহ কৰিছিল।
উল্লেখ্য যে, ব’ৱেছে এতিয়ালৈকে নিউজিলেণ্ডৰ হৈ ৬খন এদিনীয়া আৰু ১১ খন টি-২০ আন্তঃৰাষ্ট্ৰীয় মেচ খেলিছে।
