আমেৰিকাৰ ৰাষ্ট্ৰপতি ড’নাল্ড ট্ৰাম্পে ভাৰতৰ ওপৰত আৰোপ কৰা শুল্কক লৈ অব্যাহত থকা চৰ্চাৰ মাজতে কেন্দ্ৰীয় বিত্তমন্ত্ৰী নিৰ্মলা সীতাৰমণে ৰাছিয়াৰ পৰা তেল ক্ৰয় সন্দৰ্ভত এক ডাঙৰ বক্তব্য আগবঢ়াইছে। ট্ৰাম্পৰ ভাবুকিক আওকাণ কৰি ভাৰতে ৰাছিয়াৰ পৰা খাৰুৱা তেল ক্ৰয় অব্যাহত ৰাখিব বুলি মন্তব্য কৰে সীতাৰমণে।
বিত্তমন্ত্ৰী নিৰ্মলা সীতাৰমণে কয়, ‘আমি আমাৰ প্ৰয়োজন, মূল্য আৰু লজিষ্টিক চাই সিদ্ধান্ত লওঁ। বৈদেশিক মুদ্ৰা আৰু শক্তি সুৰক্ষা আমাৰ বাবে গুৰুত্বপূৰ্ণ। ভাৰতৰ মুঠ আমদানি ব্যয়ত খাৰুৱা তেলৰ অংশ সৰ্বাধিক।’
ভাৰতে য’ৰ পৰাই সস্তা আৰু সুস্থিৰ তেল পাব তাৰ পৰাই ব্যৱয়াস কৰিব বুলিও স্পষ্টতাৰে উল্লেখ কৰে বিত্তমন্ত্ৰী নিৰ্মলা সীতাৰমণে।
এটা ব্যক্তিগত চেনেলক দিয়া এক সাক্ষাৎকাৰত তেওঁ কয় যে বিশ্বৰ তৃতীয় বৃহত্তম তেল আমদানিকাৰক দেশ ভাৰতে নিজৰ অৰ্থনৈতিক স্বাৰ্থৰ প্ৰতি লক্ষ্য ৰাখি কাম কৰিব। ৰাছিয়াৰ পৰা তেল ক্ৰয় কৰাটো আমাৰ অৰ্থনৈতিক কৌশলৰ অংশ। আমি নিঃসন্দেহে তেল ক্ৰয় কৰি থাকিম। আমি আমাৰ প্ৰয়োজন অনুসৰি সিদ্ধান্ত ল’বলৈ স্বাধীন।’
আমেৰিকাৰ ৰাষ্ট্ৰপতি ড’নাল্ড ট্ৰাম্পে আৰোপ কৰা অত্যধিক শুল্কক কেৰেপ নকৰি ভাৰতে ৰাছিয়াৰ পৰা তেল ক্ৰয় অব্যাহত ৰাখিব বুলি পুনৰ কৰা মন্তব্যই এতিয়া বিশেষ চৰ্চা লাভ কৰিছে।
