গ্ৰেটাৰ নয়ডাত আৰক্ষীয়ে এক চাঞ্চল্যকৰ গোচৰ সমাধান কৰিলে। নিজৰ অপহৰণৰ নাটক কৰি পাঁচ লাখ টকা ধন দাবীৰ চক্ৰান্ত কৰা এজন লোকক গ্ৰেপ্তাৰ কৰা হৈছে।
পিছে আৰক্ষীৰ তদন্তত প্ৰকাশ পাইছে যে, অভিযুক্তই অপহৰণৰ মঞ্চস্থ কৰাই নহয়, ভুৱা গোচৰত এক দম্পতীক ফ্ৰেমৱৰ্ক কৰিবলৈও চেষ্টা কৰিছিল।
আৰক্ষীৰ মতে, ধৃত অভিযুক্তৰ নাম দশৰথ সাহু। তেওঁ চিনাকি দম্পতী কুসুম আৰু কাশী ৰাইকৱাৰৰ পৰা ধন আদায় কৰাৰ সু-পৰিকল্পিত আঁচনি ৰচনা কৰিছিল। ২৪ ছেপ্টেম্বৰত অজনৰা ছ’চাইটিৰ সমীপত অভিযুক্তই তেওঁলোকক আক্ৰমণ কৰি পাঁচ লাখ টকা দাবী কৰে। যেতিয়া দম্পতীহালে ধন দিবলৈ অস্বীকাৰ কৰে তেতিয়া দশৰাথে তেওঁলোকক ভুৱা গোচৰত জড়িত কৰি হত্যা কৰাৰ ভাবুকি দিয়ে।
ইয়াৰ পিছতে মহিলাগৰাকীয়ে নয়ডা থানাত ঘটনা সন্দৰ্ভত এজাহাৰ দাখিল কৰে। তদন্তৰ সময়ত আৰক্ষীয়ে আৱিষ্কাৰ কৰে যে দশৰথ হঠাতে নিজ ঘৰৰ পৰা নিৰুদ্দেশ হৈছে। ইফালে তেওঁৰ পত্নীয়ে কুসুম আৰু কাশিয়ে তেওঁক অপহৰণ কৰা বুলি অভিযোগ দিয়ে।
কিন্তু আৰক্ষীয়ে বিষয়টো পুংখানুপুংখভাৱে তদন্ত কৰিলে সত্য পোহৰলৈ আহে। কাৰিকৰী প্ৰমাণ আৰু চোৰাংচোৱাগিৰিৰ পৰা জানিব পৰা গৈছে যে দশৰথে অপহৰণৰ ভাও ধৰি এই কাহিনী ৰচনা কৰিছিল।
জেৰাৰ সময়ত দশৰথে স্বীকাৰ কৰে যে তেওঁ মহিলাগৰাকী আৰু তেওঁৰ স্বামীৰ বিৰুদ্ধে মিছা অভিযোগ উত্থাপন কৰি ধন দাবী কৰিবলৈ চেষ্টা কৰিছিল। তেওঁৰ পৰিকল্পনা আছিল আৰক্ষী আৰু পৰিয়াল দুয়োকে বিপথে পৰিচালিত কৰি দম্পতীহালৰ ওপৰত হেঁচা প্ৰয়োগ কৰিবলৈ অপহৰণৰ নাটক মঞ্চস্থ কৰা।
আৰক্ষীয়ে ধন দাবী, ভয় দেখুৱাই, ভুৱা গোচৰ ৰুজু কৰাৰ ষড়যন্ত্ৰৰ অভিযোগত অভিযুক্ত দশৰথৰ বিৰুদ্ধে গোচৰ ৰুজু কৰি অধিক তদন্ত আৰম্ভ কৰিছে। বিষয়াসকলে উল্লেখ কৰিছে যে যদিহে এই গোচৰৰ সৈতে আন কোনো লোক জড়িত বুলি ধৰা পৰে, তেন্তে তেওঁলোকৰ বিৰুদ্ধেও কঠোৰ ব্যৱস্থা গ্ৰহণ কৰা হ’ব।
