দৰঙৰ খাৰুপেটীয়া থানাৰ অন্তৰ্গত বৰঙাবাৰীত সংঘটিত হৈছে এক ভয়ংকৰ পথ দুৰ্ঘটনা। এখন মালবাহী ট্ৰাকত খুন্দিয়াই মৃত্যুক সাৱটি ল’লে এজন বাইক আৰোহীয়ে।
জানিব পৰা অনুসৰি, এখন তীব্ৰবেগী বাইকে আন এখন বাহনক অভাৰটেক কৰিব লওতেই বিপৰীত দিশৰ পৰা আহি থকা মালবাহী ট্ৰাকখনৰ সমুখভাগত খুন্দা মাৰে। ফলত বাইকৰ পিছত বহি থকা আৰোহীগৰাকী পথৰ ওপৰতে চিতিকি পৰি মৃত্যুক আকোৱালি লয়।
দুৰ্ঘটনাটোত নিহত লোকজনক ভালুকমাৰি গাঁৱৰ প্ৰায় ৩৫ বছৰীয়া এজন যুৱক বুলি স্থানীয় ৰাইজে জানিবলৈ দিয়ে। এইপৰ্যন্ত বাইক আৰোহী দুজনৰ নাম তথা পৰিচয় জানিব পৰা নাই।
দুৰ্ঘটনাটো সংঘটিত হোৱাৰ পিছত ঘটনাস্থলত খাৰুপেটীয়া আৰক্ষী থানাৰ যান-বাহন আৰক্ষী উপস্থিত হৈ মৃতদেহটো উদ্ধাৰ কৰি মৰণোত্তৰ পৰীক্ষাৰ বাবে চিকিৎসালয়লৈ প্ৰেৰণ কৰে।
আনহাতে AS 13 S 2140 নম্বৰৰ বাইকখন আৰু AS 01 QC 5429 নম্বৰৰ মালবাহী ট্ৰাকখন জব্দ কৰি থানালৈ লৈ যায়।
ইনপুট : মুকছিদুল ইছলাম (দলগাঁও)
