ভাৰতীয় জনতা পাৰ্টিৰ সাংসদ ভৰত্ৰিহাৰী মাহতাবক এক দেশ এক নিৰ্বাচনৰ প্ৰস্তাৱ থকা দুখন বিধেয়ক পৰীক্ষা কৰিবলৈ সংসদৰ যুটীয়া সমিতিৰ অধ্যক্ষ হিচাপে বিবেচিত হৈছে।
বৃহস্পতিবাৰে এক সূত্ৰই জনোৱা অনুসৰি, ৰাজ্যসভাৰ ১০ গৰাকীৰ সদস্যৰে এক দেশ এক নিৰ্বাচনত গঠন হ’বলগীয়া জেপিচিৰ দলটো আজি ঘোষণা কৰিব পৰা যাব। ওড়িশাৰ পৰা বিজেপিৰ সাংসদ ভৰত্ৰিহাৰী হৰি মাহতাবক জেপিচিৰ অধ্যক্ষ হিচাপে নিযুক্তি দিব পাৰে।
চৰকাৰী সূত্ৰই জনোৱা মতে, এই গুৰুত্বপূৰ্ণ সমিতিৰ অধ্যক্ষৰ পদ বিজেপিয়ে পোৱাটো নিশ্চিত, এনে পৰিস্থিতিত মাহতাবৰ সংসদীয় অভিজ্ঞতা তেওঁৰ পক্ষত যাব পাৰে। মাহতাব ওড়িশাৰ পৰা সাতবাৰকৈ লোকসভাৰ সদস্য হৈ বৰ্তমান বিত্ত মন্ত্ৰালয়ৰ স্থায়ী সমিতিৰ মুৰব্বী।
লোকসভা আৰু ৰাজ্যিক বিধানসভাৰ একেলগে নিৰ্বাচনৰ ব্যৱস্থা কৰা বিধেয়ক অধ্যয়নৰ বাবে যুটীয়া সংসদীয় সমিতিৰ সদস্যপদৰ বাবে নাম প্ৰস্তাৱ কৰা ২১ জন লোকসভা সদস্যৰ ভিতৰত মাহতাব অন্যতম। মাহতাবৰ লগতে অনুৰাগ ঠাকুৰ, পি পি চৌধুৰীকে ধৰি ১০ জন বিজেপি সাংসদ ইয়াত অন্তৰ্ভুক্ত।
এক জাতি এক নিৰ্বাচনৰ দিশত এখোজ আগুৱাই গৈ কেন্দ্ৰীয় চৰকাৰে বিৰোধী দলসমূহৰ তীব্ৰ বিৰোধিতাৰ মাজতে ১৭ ডিচেম্বৰত লোকসভাত সংবিধানৰ ১২৯ সংখ্যক সংশোধনী বিধেয়ক আৰু ইয়াৰ সৈতে জড়িত আন এখন বিধেয়ক উত্থাপন কৰিছিল। তাৰ পিছত বিৰোধীয়ে সংবিধান সংশোধনী বিধেয়কখন যুটীয়া সংসদীয় সমিতিলৈ প্ৰেৰণ কৰিবলৈ দাবী জনাইছিল। একে সময়তে সংবিধান সংশোধনীৰ বাবে দুই তৃতীয়াংশ সংখ্যাগৰিষ্ঠতা সংগ্ৰহৰ প্ৰত্যাহ্বান আৰু বিৰোধীৰ দাবীৰ প্ৰতি লক্ষ্য ৰাখি কেন্দ্ৰীয় চৰকাৰে দুয়োখন বিধেয়ক জেপিচিলৈ প্ৰেৰণ কৰিবলৈ সন্মত হয়।
