প্ৰাক্তন ৰাষ্ট্ৰপতি ৰামনাথ কোবিন্দ কমিটীৰ এক দেশ এক নিৰ্বাচনৰ প্ৰস্তাৱত অনুমোদন জনাইছে মোদী চৰকাৰে। বুধবাৰে এই প্ৰস্তাৱত অনুমোদন জনোৱাৰ পিছত এতিয়া চৰকাৰে সংসদত বিধেয়কখন উত্থাপন কৰিব আৰু তাতেই হ’ব ইয়াৰ প্ৰকৃত পৰীক্ষা।
সংসদৰ উচ্চ সদনত অৰ্থাৎ ৰাজ্যসভাত বিধেয়কখন গৃহীত কৰাত চৰকাৰে কোনো অসুবিধাৰ সন্মুখীন নহ’ব যদিও লোকসভাৰ যুঁজখন কঠিন হ’ব বুলি অনুমান কৰা হৈছে। যেতিয়া নিম্ন সদনত বিধেয়কখনৰ ওপৰত ভোটদানৰ পাল আহিব তেতিয়া চৰকাৰক ৬৯জন সাংসদৰ প্ৰয়োজন হ’ব।
কোবিন্দ কমিটীয়ে এক দেশ এক নিৰ্বাচন সন্দৰ্ভত মুঠ ৬২টা ৰাজনৈতিক দলৰ পৰা মতামত বিচাৰিছিল, ইয়াৰে ৪৭টা দলে উত্তৰ প্ৰেৰণ কৰাৰ বিপৰীতে ১৫টা দলে কোনো সঁহাৰি দিয়া নাছিল। ৪৭টা ৰাজনৈতিক দলৰ ভিতৰত ৩২টা দলে কোবিন্দ কমিটীৰ পৰামৰ্শক সমৰ্থন কৰাৰ বিপৰীতে ১৫টা দলে বিৰোধিতা কৰে।
কোবিন্দ কমিটীৰ পৰামৰ্শক সমৰ্থন কৰা ৩২টা দলৰ ভিতৰত অধিকাংশই বিজেপিৰ মিত্ৰ দল। পূৰ্বে মোদী চৰকাৰ দ্বিতীয় কাৰ্যকালক সমৰ্থন কৰা ওড়িষাৰ নবীন পাটনাইকৰ দল বিজেডিয়েও এতিয়া নিজৰ স্থিতি সলনি কৰিছে। একে সময়তে কমিটীৰ পৰামৰ্শৰ বিৰোধিতা কৰা ১৫টা দলৰ ভিতৰত কংগ্ৰেছ, এছ পি, আপৰ দৰে দলো আছে।
সংসদত সংখ্যাৰ খেল কি?
শেহতীয়াকৈ অনুষ্ঠিত হৈ যোৱা লোকসভা নিৰ্বাচনৰ পিছত ২৭১জন সাংসদে কোবিন্দ সমিতিৰ পৰামৰ্শক সমৰ্থন কৰে। ইয়াৰে ২৪০ জন সাংসদ বিজেপিৰ। লোকসভাত এন ডি এৰ পৰিসংখ্যাৰ কথা ক’লে সেয়া হ’ল ২৯৩। যেতিয়া এই বিধেয়কখন লোকসভাত উত্থাপন হ’ব আৰু ভোটদানৰ পাল আহিব, তেতিয়া চৰকাৰক বিধেয়কখন গৃহীত কৰিবলৈ ৩৬২টা ভোট বা দুই তৃতীয়াংশ সংখ্যাগৰিষ্ঠতাৰ প্ৰয়োজন হ’ব।
অৱশ্যে ভোটদানৰ সময়ত লোকসভাত সকলো সাংসদ উপস্থিত থাকিলেহে এই পৰিস্থিতিৰ উদ্ভৱ হ’ব। কিন্তু ভোটদানৰ সময়ত যদি লোকসভাত মাত্ৰ ৪৩৯জন সাংসদ (যদি ১০০জন সাংসদ উপস্থিত নাথাকে) উপস্থিত থাকে তেন্তে ২৯৩টা ভোটৰ প্ৰয়োজন হ’ব। এন ডি এৰ হাতত আছে এই সংখ্যা। কিন্তু ভোটদানৰ সময়ত বিৰোধী দলৰ সকলো সাংসদ লোকসভাত উপস্থিত থাকিলে সংবিধান সংশোধনী বিধেয়ক বিফল হ’ব।
ৰাজ্যসভাৰ কথা ক’বলৈ গ’লে ইয়াত পৰিস্থিতি চৰকাৰৰ সপক্ষে যেন লাগে। এন ডি এৰ আছে ১১৫ জন সাংসদ। ইয়াৰ লগত যদি আমি ৬ জন মনোনীত সাংসদ যোগ কৰো তেন্তে এই সংখ্যা ১২১ জন হৈ পৰে। ৰাজ্যসভাত ভোটদানৰ সময়ত যদি ২৫০ জন সদস্য উপস্থিত থাকে, তেন্তে সংখ্যাগৰিষ্ঠতাৰ সংখ্যা হ’ব ১২৫ আৰু দুই তৃতীয়াংশ হ’ব ১৬৪। বৰ্তমান ৰাজ্যসভাত ২৩৪ জন সাংসদ আছে।
এনডিএৰ পক্ষত ২৭টা দল
পৰিসংখ্যা অনুসৰি, বিজেপি নেতৃত্বাধীন এন ডি এৰ ২৭টা দল এক দেশ এক নিৰ্বাচনৰ পক্ষত আছে। কেৱল ইয়াৰ বিৰোধিতাত আছে নগা পিপলছ ফ্ৰণ্ট। আনহাতে ইণ্ডিয়া মিত্ৰজোঁটৰ ১০টা দলে ইয়াৰ বিৰোধিতা কৰিছে।
একে সময়তে ১০টা দল আছে যিবোৰ এন ডি এৰ অংশও নহয় ইণ্ডিয়াৰ অংশও নহয়। ইয়াত ৬ টা দলে বিচাৰিছে যে এক দেশ এক নিৰ্বাচন হওক, আনহাতে ৪ টা দলে চৰকাৰৰ এই পদক্ষেপৰ বিৰোধিতা কৰিছে।
বিৰোধী দলৰ ভিতৰত কংগ্ৰেছ, আপ, বিএছপি, চিপিআইএম, ডিএমকে, টিএমচি, চিপিআই, এনপিএফ, এআইইউডিএফ, এআইএমআইএম, এমডিএমকে, ভিচিকে, চিপিআই (এম-এল), এছডিপি (আই)।
কোনবোৰ দল এক দেশ এক নিৰ্বাচনৰ পক্ষত?
এক দেশ এক নিৰ্বাচনৰ পক্ষত থকা দলসমূহ হ’ল বিজেপি, এ জে এছ ইউ, আপনা দল (সোনেলাল), অগপ, এলজেপি (আৰ), এনডিপিপি, এছকেএম, মিজো নেশ্যনেল ফ্ৰণ্ট, জেডিইউ, ইউপিপিএলএ, শিৱসেনা (শিন্দে ফৈদ), টিডিপি। বিজেপিৰ প্ৰাক্তন মিত্ৰ দল আকালি দল আৰু এআইএডিএমকেও এক দেশ এক নিৰ্বাচনত সমৰ্থন আগবঢ়াইছে।
কমিটীৰ প্ৰস্তাৱৰ প্ৰতি সঁহাৰি নিদিয়া দলসমূহৰ ভিতৰত আছে বি আৰ এছ, আই ইউ এম এল, নেচনেল কনফাৰেন্স, জে ডি এছ, জে এম এম, কেৰালা কংগ্ৰেছ (এম), এন চি পি (শাৰদ পাৱাৰ), আৰ জে ডি, আৰ এছ পি, ৱাই এছ আৰ চি পি, টি ডি পি, আৰ এল ডি, শিৰোমণি আকালি দল (হান), নেচনেল ডেম’ক্ৰেটিক পাৰ্টি, ছিকিম ডেম’ক্ৰেটিক ফ্ৰণ্ট।
