পাকিস্তানৰ ফিল্ড মাৰ্শ্বাল অসীম মুনীৰ আৰু প্ৰাক্তন বৈদেশিক মন্ত্ৰী বিলোৱাল ভুট্টোৱে ভাৰতক পাৰমাণৱিক বোমা আক্ৰমণৰ ভাবুকি দি থাকে। এই ভাবুকিৰ মাজতো ভাৰতে অপাৰেচন সিন্দুৰৰ পিছত প্ৰথমবাৰৰ বাবে পাকিস্তানক সহায় কৰিছে। দৰাচলতে পাকিস্তানত বানপানীয়ে ব্যাপক বিধ্বংসী ৰূপ ধাৰণ কৰিছে, য’ত প্ৰায় ৫০০ লোকৰ মৃত্যু হৈছে।
ইফালে ভাৰতে পাকিস্তানী বিষয়াসকলক বানপানীৰ বিষয়ে অৱগত কৰিছে। অপাৰেচন সিন্দুৰৰ পিছত এইবাৰ দুয়োখন দেশৰ বিষয়াৰ মাজত যোগাযোগৰ সৃষ্টি হৈছে।
সূত্ৰৰ উদ্ধৃতিৰে পাকিস্তানী সংবাদ মাধ্যমে প্ৰকাশ কৰিছে যে, মে’ মাহত সংঘটিত সামৰিক সংঘৰ্ষৰ পিছত ভাৰত আৰু পাকিস্তানৰ মাজত প্ৰথমবাৰৰ বাবে যোগাযোগ হৈছে। ভাৰতে পাকিস্তানী বিষয়াসকলৰ সৈতে যোগাযোগ কৰি সম্ভাৱ্য বানপানীৰ বিপদৰ বিষয়ে বিতং তথ্য ভাগ-বতৰা কৰিছে।
পাকিস্তানৰ সংবাদ মাধ্যমৰ তথ্য অনুসৰি, ভাৰতে তাৱী নদীত ভয়াৱহ বানপানীৰ সকীয়নি দিছে। ইছলামবাগৰ ভাৰতীয় উচ্চায়ুক্তই ২৪ আগষ্টত এই তথ্য দিছিল, যাৰ ভিত্তিত পাকিস্তানী কৰ্তৃপক্ষই তেওঁলোকৰ জনসাধাৰণক বানপানীৰ সতৰ্কবাণী জাৰি কৰিছিল। উল্লেখ্য যে, জম্মুৰ পৰা পাকিস্তানৰ পঞ্জাৱত তাৱী নদী প্ৰৱেশ কৰে।
আচলতে পাকিস্তানত ধাৰাসাৰ বৰষুণৰ বাবে বান সদৃশ পৰিস্থিতিৰ সৃষ্টি হৈছে। পঞ্জাৱ ৰাজ্যত যোৱা ২৪ ঘন্টাত ২০ হাজাৰৰো অধিক লোকক সুৰক্ষিত স্থানলৈ স্থানান্তৰ কৰা হৈছে। খাইবাৰ পখতুনখোৱা প্ৰদেশত বানপানীৰ সৰ্বোচ্চ প্ৰভাৱ দেখা গৈছে, য’ত ৩৫০ জনতকৈ অধিক লোকৰ মৃত্যু হোৱাৰ বিপৰীতে ৫০০ৰো অধিক লোক আহত হৈছে। ইয়াৰ উপৰিও পানীজনিত ৰোগৰ আশংকাও বৃদ্ধি পাইছে। এই পৰ্যন্ত ১৫ হাজাৰৰো অধিক ৰোগীৰ খবৰ পোৱা গৈছে। বানাক্ৰান্ত ৰাজ্যসমূহত এনডিএমএ, সেনা আৰু অন্যান্য বেচৰকাৰী সংস্থাসমূহে সাহায্য আৰু উদ্ধাৰৰ কামত নিয়োজিত হৈ আছে।
চলিত বৰ্ষৰ ২২ এপ্ৰিলত কাশ্মীৰৰ পেহেলগাম উপত্যকাত সন্ত্ৰাসবাদী আক্ৰমণ সংঘটিত হৈছিল, য’ত ২৬ জন পৰ্যটকৰ মৃত্যু হৈছিল। ইয়াৰ পিছত ভাৰতে পাকিস্তানৰ বিৰুদ্ধে কঠোৰ পদক্ষেপ গ্ৰহণ কৰে, য’ত সিন্ধু জল সন্ধি বাতিল কৰা, ভিছা স্থগিত ৰখা আৰু ৱাগাহ-আটাৰী সীমান্ত বন্ধ কৰা আদি আছিল। ইয়াৰ পিছত ভাৰতীয় সেনাই ৬-৭ মে’ৰ নিশা পাকিস্তানত প্ৰৱেশ কৰি অপাৰেচন সিন্দুৰ চলায়। এই বিমান আক্ৰমণত পাকিস্তান আৰু পাক অধীকৃত কাশ্মীৰত উপস্থিত থকা ১০০ৰো অধিক সন্ত্ৰাসবাদী নিহত হোৱাৰ বিপৰীতে ১০টাতকৈও অধিক সন্ত্ৰাসবাদীৰ আত্মগোপন স্থান ধ্বংস কৰা হয়। ইয়াৰ পিছত দুয়োখন দেশৰ মাজত সম্পৰ্ক অৱনতি ঘটিছিল আৰু তাৰ পিছত পাকিস্তানে ভাৰতৰ বিৰুদ্ধে সামৰিক ব্যৱস্থা আৰম্ভ কৰিছিল, য’ত পৰাজয়ৰ সন্মুখীন হ’বলগীয়া হৈছিল।
