নগাঁও জিলাৰ ধিং বিধানসভা সমষ্টিত ক্ৰমাৎ আকৰ্ষণীয় হৈ পৰিছে পঞ্চায়ত নিৰ্বাচনৰ প্ৰচাৰ অভিযান। ৭ মে’ত অনুষ্ঠিত হ’বলগীয়া ভোটগ্ৰহণক কেন্দ্ৰ কৰি ইতিমধ্যে ভোটাৰক আকৰ্ষণ কৰি তৃণমূল পৰ্যায়ৰ ক্ষমতা দখল কৰিবলৈ উঠি-পৰি লাগিছে শাসক-বিৰোধী।
পিছ পৰি ৰোৱা নাই সংখ্যালঘু অধ্যুষিত ধিং বিধানসভা সমষ্টি। এই সমষ্টিটোৰ অন্তৰ্গত ৩৪ নং চহৰীয়া গাঁও পঞ্চায়ত দখলৰ মৰণপণ যুঁজত নামিছে ভাৰতীয় জনতা পাৰ্টী চমুকৈ বিজেপি।
এই পঞ্চায়তখনত আঞ্চলিক সদস্যা পদত শাসকীয় মিত্ৰজোঁটৰ হৈ প্ৰতিদ্বন্দ্বিতা আগবঢ়াইছে বিজেপিৰ জ্যোতি প্ৰভা দেৱীয়ে। উচ্চ শিক্ষিতা জ্যোতি প্ৰভা দেৱীয়ে পঞ্চায়তখনৰ অন্তৰ্গত গাঁৱে-ভূঞে প্ৰচাৰ চলাই ভোটাৰ ৰাইজৰ মন জয়ী কৰিবলৈ সক্ষম হৈছে।
বিজেপিৰ আগ্ৰাসী প্ৰচাৰ অভিযান আৰু সৰ্বস্তৰৰ ৰাইজৰ আস্থা আৰু বিশ্বাস দেখি এইবাৰৰ নিৰ্বাচনত বিপক্ষৰ প্ৰাৰ্থীক সহজেই পৰাস্ত কৰিবলৈ সক্ষম হ’ব বুলি গভীৰ আত্মবিশ্বাসী জ্যোতি প্ৰভা দেৱী।
লক্ষ্যণীয় কথাটো হ’ল যে এই পঞ্চায়তখন বিভিন্ন ভাষা, ধৰ্মাৱলম্বী ভোটাৰেৰে গঠিত। অতি আকৰ্ষণীয় এই পঞ্চায়তখনত বড়ো অধ্যুষিত ভোটাৰৰ লগতে আছে সংখ্যালঘু ভোটাৰ। বিজেপিৰ হৈ প্ৰতিদ্বন্দ্বিতা আগবঢ়োৱা জ্যোতি প্ৰভা দেৱী হৈছে বাৰুৱাটী গাঁৱৰ বাসিন্দা।
উল্লেখ্য যে, ইয়াৰ পূৰ্বে অনুষ্ঠিত হৈ যোৱা পঞ্চায়ত নিৰ্বাচনতো এই পঞ্চায়তখনৰ পৰা সদস্য পদত বিজেপিৰ গৌতম দেউৰী আৰু সভাপতি পদত সৰস্বতী বসুমতাৰীয়ে জয়লাভ কৰিছিল।
বৰ্তমান এ আই ইউ ডি এফৰ দখলত থকা ধিং সমষ্টিৰ এই পঞ্চায়তখনত বিজেপি মিত্ৰজোঁট আৰু কংগ্ৰেছৰ মাজতেই মূল প্ৰতিদ্বন্দ্বিতা হ’ব বুলি ধাৰণা কৰা হৈছে। অৱশ্যে প্ৰচাৰৰ দিশৰ প্ৰতি লক্ষ্য ৰাখিলে পুনৰবাৰ আঞ্চলিক সদস্যা পদত বিজেপিয়ে শেষ হাঁহি মাৰিব বুলি ধাৰণা কৰা হৈছে।
