ইৰাণ, ইজৰাইল আৰু আমেৰিকাৰ মাজত চলি থকা সংঘাতৰ পিছতেই ১০ মাৰ্চত প্ৰধানমন্ত্ৰী নৰেন্দ্ৰ মোদীয়ে কেবিনেট বৈঠকত এক উল্লেখযোগ্য বক্তব্য আগবঢ়ায়। তেওঁ নিজৰ মন্ত্ৰালয়ক আহ্বান জনায় যে, মন্ত্ৰালয় আৰু বিভাগসমূহে একেলগে কাম কৰি ভাৰতৰ জনসাধাৰণৰ ওপৰত ইৰাণ-ইজৰাইল যুদ্ধৰ প্ৰভাৱ সীমিত কৰাৰ লগতে মধ্যপ্ৰাচ্যৰ সংকটে যাতে জনসাধাৰণক প্ৰভাৱিত নকৰে তাৰ প্ৰতি লক্ষ্য ৰখা উচিত। লগতে তেওঁলোকক যিকোনো সম্ভাৱ্য প্ৰত্যাহ্বানৰ বাবেও সাজু থাকিবলৈ আহ্বান জনায়।
আজি ইৰাণ যুদ্ধৰ একাদশ দিন। ২৮ ফেব্ৰুৱাৰীৰ পৰা আৰম্ভ হোৱা এই সংঘাত হ্ৰাস দীৰ্ঘদিন ধৰি চলি থকা সংঘাতৰ ফলত দেশত তেল সংকটৰ সৃষ্টি হৈছে। ভাৰতবৰ্ষৰ বহু ৰাজ্যত চিলিণ্ডাৰৰ মূল্য বৃদ্ধি হৈছে। হোটেল, ৰেষ্টুৰেণ্ট বন্ধ হোৱাৰ উপক্ৰম হৈছে। এনে পৰিস্থিতিত প্ৰধানমন্ত্ৰী মোদীৰ মন্ত্ৰীসকললৈ এই বাৰ্তাই জনসাধাৰণৰ বাবে হয়তো সকাহ হ’ব পাৰে।
তেল সংকটৰ পোহৰত ভাৰতে খাৰুৱা তেল আৰু গেছৰ যোগানৰ কৌশল সংশোধন কৰিছে। গেছৰ নাটনি দূৰ কৰিবলৈ চৰকাৰে শোধনাগাৰসমূহক এল পি জি উৎপাদন বৃদ্ধি কৰিবলৈ নিৰ্দেশ দিছে। ঘৰুৱা এল পি জি যোগানৰ ক্ষেত্ৰত চৰকাৰে অগ্ৰাধিকাৰ প্ৰকাশ কৰিছে। হাৰ্ডিং আৰু ব্লেক মাৰ্কেটিং ৰোধৰ বাবে ২৫ দিনৰ আন্তঃবুকিং নিয়ম কাৰ্যকৰী কৰা হৈছে। তদুপৰি, অনা-ঘৰুৱা খণ্ডৰ বাবে এল পি জি যোগানৰ চাহিদা পুনৰীক্ষণৰ বাবে এখন সমিতি গঠন কৰা হৈছে। আমদানিকৃত এল পি জিক অত্যাৱশ্যকীয় অঘৰুৱা খণ্ড যেনে চিকিৎসালয় আৰু শিক্ষানুষ্ঠানৰ বাবে অগ্ৰাধিকাৰ দিয়া হৈছে।
কেবিনেট বৈঠকত গ্ৰহণ কৰা ৬ টা মূল সিদ্ধান্ত-
- জল জীৱন অভিযান ২.০ত অনুমোদন
- মাদুৰাই বিমানবন্দৰ আন্তঃৰাষ্ট্ৰীয় বিমানবন্দৰ ঘোষণা
- জেৱাৰ আৰু ফৰিদাবাদৰ মাজত উচ্চ পথ অনুমোদিত
- ছাইন্থিয়া আৰু পাকুৰৰ মাজত চতুৰ্থ ৰেলপথ অনুমোদিত
- চতুৰ্থ ৰেল লাইন অনুমোদন সন্ত্ৰগাছি আৰু খৰগপুৰৰ মাজত
- মধ্যপ্ৰদেশ ঘাইপথ প্ৰকল্প অনুমোদন
