৩ আৰু ৪ ছেপ্তেম্বৰত দুদিনীয়াকৈ অনুষ্ঠিত হোৱা জি এছ টি পৰিষদৰ বৈঠকত দীৰ্ঘদিনৰ পৰা চলি থকা চাৰি তৰপীয়া জি এছ টি আঁতৰোৱাৰ সিদ্ধান্ত সন্দৰ্ভত প্ৰথমবাৰৰ বাবে প্ৰতিক্ৰিয়া প্ৰকাশ কৰিছে দেশ প্ৰধানমন্ত্ৰী নৰেন্দ্ৰ মোদীয়ে।
স্বাধীনতাৰ পিছত দেশৰ এইটোৱেই আটাইতকৈ ডাঙৰ সিদ্ধান্ত বুলি উল্লেখ কৰে প্ৰধানমন্ত্ৰী নৰেন্দ্ৰ মোদীয়ে।
ৰাষ্ট্ৰীয় বঁটাপ্ৰাপ্ত বিজয়ী শিক্ষকৰ সৈতে অনুষ্ঠিত এক কাৰ্যসূচীৰ সময়ত তেওঁ জি এছ টি সংস্কাৰৰ কথা উল্লেখ কৰি কয়, ‘সময়ত পৰিবৰ্তন অবিহনে আজিৰ বিশ্বব্যাপী পৰিস্থিতিত আমি আমাৰ দেশক উচিত স্থান দিব নোৱাৰো। এইবাৰ ১৫ আগষ্টত মই লালকিল্লাৰ পৰাই কৈছিলোঁ যে ভাৰতবৰ্ষক স্বাৱলম্বী কৰিবলৈ পৰৱৰ্তী প্ৰজন্মৰ সংস্কাৰ আৱশ্যক। এই দীপাৱলী আৰু ষঠ পূজাৰ পূৰ্বে জনসাধাৰণৰ সুখ দুগুণ বৃদ্ধি পাব বুলিও দেশবাসীক প্ৰতিশ্ৰুতি দিছিলো।’
প্ৰধানমন্ত্ৰী মোদীয়ে কয় যে ২২ ছেপ্টেম্বৰ অৰ্থাৎ নৱৰাত্ৰিৰ প্ৰথম দিনৰ পৰা জি এছ টিৰ নতুন হাৰ কাৰ্যকৰী হ’ব। এই নতুন দুতৰপীয়া জি এছ টিয়ে ভাৰতৰ অৰ্থনীতি আৰু জনসাধাৰণৰ জীৱন ধাৰণত যথেষ্ট সুপ্ৰভাৱ পৰিব বুলিও উল্লেখ কৰে।
ইফালে দেশৰ উদ্যোগ জগতে শেহতীয়া জি এছ টি সংস্কাৰ ব্যৱস্থাক আদৰণি জনাই কৰ ব্যৱস্থাৰ সৰলীকৰণৰ ফলস্বৰূপে ব্যৱসায়-বাণিজ্য পূৰ্বতকৈ সহজ হৈ উঠিব বুলি মত প্ৰকাশ কৰিছে।
উল্লেখ্য যে, ৩ ছেপ্তেম্বৰত দেশৰ বিত্ত মন্ত্ৰী নিৰ্মলা সীতাৰমণৰ অধ্যক্ষতাত অনুষ্ঠিত হোৱা জি এছ টি পৰিষদৰ বৈঠকত পূৰ্বৰ পৰা চলি থকা ৫, ১২, ১৮ আৰু ২৮ শতাংশৰ পৰা দুই তৰপীয়া (৫ আৰু ১৮) জি এছ টি সৰল কৰাত অনুমোদন জনাইছে পৰিষদে।
