বিশ্বৰ অন্যতম বৃহৎ সংগঠন ভাৰতৰ ৰাষ্ট্ৰীয় স্বয়ংসেৱক সংঘই(আৰ এছ এছ) আড়ম্বৰপূৰ্ণভাৱে উদযাপন কৰিব শতবাৰ্ষিকী। দেশৰ এটা আগশাৰীৰ সংবাদ সংস্থাৰ এক প্ৰতিবেদন অনুসৰি ১ অক্টোবৰত ৰাজধানী দিল্লীৰ আম্বেদকাৰ আন্তঃৰাষ্ট্ৰীয় কেন্দ্ৰত এই শতবাৰ্ষিকী অনুষ্ঠানৰ আয়োজন কৰা হৈছে।
প্ৰধানমন্ত্ৰীৰ কাৰ্যালয়ৰ উদ্ধৃতি দি সংবাদ সংস্থাটোৱে প্ৰকাশ কৰিছে যে আৰ এছ এছৰ শতবাৰ্ষিকী উদযাপনত মুখ্য অতিথি হিচাপে অংশগ্ৰহণ কৰিব প্ৰধানমন্ত্ৰী নৰেন্দ্ৰ মোদীয়ে।
প্ৰধানমন্ত্ৰী মোদীয়ে সংস্থাটোৰ ১০০ বছৰ সম্পূৰ্ণ হোৱাৰ উপলক্ষে ডাক টিকট আৰু এটা মুদ্ৰাও মুকলি কৰিব। মন কৰিবলগীয়া যে প্ৰধানমন্ত্ৰী মোদীয়ে তেওঁৰ মাহেকীয়া ৰেডিঅ’ অনুষ্ঠান ‘মন কী বাত’ত আৰ এছ এছৰ শতবাৰ্ষিকীৰ কথাও উল্লেখ কৰিছিল।
যোৱা দেওবাৰে তেওঁৰ ‘মন কী বাত’ কাৰ্যসূচীত দেশবাসীক সম্বোধন কৰি প্ৰধানমন্ত্ৰী নৰেন্দ্ৰ মোদীয়ে ৰাষ্ট্ৰীয় স্বয়ংসেৱক সংঘৰ ১০০ বছৰ সম্পূৰ্ণ কৰাৰ ‘অভূতপূৰ্ব আৰু প্ৰেৰণাদায়ক’ যাত্ৰাক প্ৰশংসা কৰে।
প্ৰধানমন্ত্ৰী মোদীয়ে কয়, ‘এই বিজয়দশমী আন এক কাৰণত অতি বিশেষ। এই দিনটোত ৰাষ্ট্ৰীয় স্বয়ংসেৱক সংঘ প্ৰতিষ্ঠাৰ ১০০ বছৰ সম্পূৰ্ণ হ’ল। এক শতিকাৰ এই যাত্ৰা যিমানেই আচৰিত আৰু অভূতপূৰ্ব সিমানেই প্ৰেৰণাদায়ক।’
