গুজৰাটৰ কচ্ছত নিয়োজিত সীমান্ত সুৰক্ষা বাহিনী (বি এছ এফ)ৰ জোৱানৰ সৈতে প্ৰধানমন্ত্ৰী নৰেন্দ্ৰ মোদীয়ে উদযাপন কৰে দীপাৱলী। জোৱানৰ সৈতে এই উৎসৱ উদযাপনৰ পৰম্পৰা অব্যাহত ৰাখি পশ্চিম সীমান্তত থকা বি এছ এফৰ এটা পোষ্ট পৰিদৰ্শন কৰি জোৱানসকলৰ সৈতে মত বিনিময় কৰি দীপাৱলীৰ শুভেচ্ছা জনায় প্ৰধানমন্ত্ৰী মোদীয়ে।
ছ’চিয়েল মিডিয়াত প্ৰকাশ পোৱা এটা ভিডিঅ’ত দেখা গৈছে যে প্ৰধানমন্ত্ৰী মোদীয়ে নিজৰ হাতেৰে জোৱানসকলক মিঠাই খুৱাইছিল।
২০১৪ চনত ক্ষমতালৈ অহাৰ পিছৰে পৰা প্ৰধানমন্ত্ৰী নৰেন্দ্ৰ মোদীয়ে দেশৰ বিভিন্ন স্থানত সামৰিক বাহিনীৰ সৈতে দীপাৱলী উদযাপন কৰাটো পৰম্পৰা হিচাপে গঢ়ি তুলিছে। প্ৰতি বছৰে মোদীয়ে সামৰিক সুবিধাসমূহ পৰিদৰ্শন কৰে, য’ত তেওঁ জোৱানৰ সৈতে মত বিনিময় কৰে আৰু উৎসৱ পালন কৰে।
এই সময়ছোৱাত প্ৰধানমন্ত্ৰী মোদীৰ বেশ-ভূষাও আছিল বিশেষ। সেনাবাহিনীৰ ইউনিফৰ্ম, মূৰত টুপি আৰু চছমা পিন্ধা দেখা যায় প্ৰধানমন্ত্ৰী মোদীক।
