উত্তৰ প্ৰদেশৰ প্ৰয়াগৰাজ জিলাত সংঘটিত হৈছে এক ভয়ংকৰ পথ দুৰ্ঘটনা। এই দুৰ্ঘটনাত ১০ জন ভক্তৰ প্ৰাণ হেৰুওৱাৰ খবৰ পোৱাৰ বিপৰীতে আহত হৈছে ১৯ জন লোক।
তথ্য লাভ কৰাৰ লগে লগে আৰক্ষী সেই স্থানত আহি উপস্থিত হয় আৰু আহতসকলক উদ্ধাৰ কৰি ওচৰৰ চিকিৎসালয়ত ভৰ্তি কৰোৱা হয়। এই দুৰ্ঘটনাটোত থকা আটাইকেইজন লোকেই আছিল পুৰুষ, যাৰ বয়স আছিল ২৫ৰ পৰা ৪৫ বছৰৰ ভিতৰত।
তথ্য অনুসৰি, ১৪ ফেব্ৰুৱাৰীত সন্ধিয়া প্ৰয়াগৰাজ-মিৰ্জাপুৰ ঘাইপথত এক ভয়ংকৰ পথ দুৰ্ঘটনা সংঘটিত হয়। এখন বলেৰো গাড়ী আৰু এখন বাছৰ মুখামুখি সংঘৰ্ষত ১০ জনকৈ লোকে প্ৰাণ হেৰুৱায়। এই দুৰ্ঘটনাত বলেৰ’ত যাত্ৰা কৰা ১০ জন ভক্তৰ থিতাতে প্ৰাণহানি হয়। আটাইকেইজনেই আছিল ছত্তীশগড়ৰ কোৰবা জিলাৰ বাসিন্দা।
জানিব পৰা মতে, বলেৰ’ত যাত্ৰা কৰা ১০ জন ভক্ত আটাইকেইজনেই প্ৰয়াগৰাজত মহাস্নান কৰাৰ বাবে গৈছিল। সংগমত স্নান কৰি বাৰাণসীলৈ গৈ থকা অৱস্থাতে এই দুৰ্ঘটনাত বাছখনত যাত্ৰা কৰা ১৯ জন ভক্ত আহত হয়। আহত আটাইকেইজনক চি এইচ চি ৰামনগৰত ভৰ্তি কৰোৱা হয়। ইফালে বাছখনত যাত্ৰা কৰা সকলো ভক্ত মধ্যপ্ৰদেশৰ ৰাজগড় জিলাৰ বাসিন্দা।
