ব্যতিক্ৰমী অভিনয় শৈলীৰে জনপ্ৰিয়তা অৰ্জন কৰা বলীউডৰ কমেডী অভিনেতা ৰাজপাল যাদৱে কিয় ৰাজনীতিৰ পৰা আঁতৰি আহি পুনৰ অভিনয়ত মনোনিৱেশ কৰিছিল সেই কথা প্ৰথমবাৰৰ বাবে ৰাজহুৱা কৰিছে।
উল্লেখ্য যে, নিজাকৈ এটা দল সৰ্ব সম্ভৱ পাৰ্টি (এছ এছ পি) আৰম্ভ কৰি ৰাজনীতিত প্ৰৱেশ কৰিছিল অভিনেতাগৰাকীয়ে। অৱশ্যে পিছলৈ তেওঁ ৰাজনীতিৰ পৰা আঁতৰি আহি অভিনয়ত মনোনিৱেশ কৰিছিল।
শেহতীয়াকৈ ৰাজপাল যাদৱে ৰাজনীতি ত্যাগ সন্দৰ্ভত কয় যে ইয়াৰ কাৰণ হৈছে প্ৰধানমন্ত্ৰী নৰেন্দ্ৰ মোদী।
এটা আগশাৰীৰ সংবাদ সংস্থাৰ সন্মুখত ৰাজপাল যাদৱে কয়, ‘২০১৯ চনত মোদী চাহাবৰ বাবেই ৰাজনীতিৰ পৰা চিৰদিনৰ বাবে বিদায় লৈছিলো। এই ৪-৫ টা বস্তু মোৰ বৰ ভাল লাগিছিল – পানী, হাবি, মাটি, পৰিৱেশ, পাহাৰ। মই উপলব্ধি কৰিলো যে মই যি পৰিৱৰ্তন আনিব বিচাৰো, মোদী ডাঙৰীয়াই কৰিছে।’
প্ৰধানমন্ত্ৰী মোদী সম্পৰ্কত ৰাজপাল যাদৱে আৰু কয়, ‘তেওঁ সমগ্ৰ দেশ আৰু বিশ্বক এটা বাৰ্তা দিলে যে ভাই কাজিয়া নকৰিব। গতিকে যিবোৰ কাম মই কৰি ভাল পাওঁ, সেই সকলোবোৰ মোদী ডাঙৰীয়াই কৰিলে। মোক আৰু কি লাগে? যদি মই ৰাজনীতি কৰিব লগা হয়, তেন্তে মই অভিনয় সম্পূৰ্ণৰূপে এৰিব লাগিব। দুয়োটাক সময় দিয়াৰ প্ৰয়োজন আৰু দুয়োটা একেলগে আগবঢ়াই নিব নোৱাৰি। সেয়ে মই অনুভৱ কৰো যে মোক কেৱল শিল্পৰ বাবেই সৃষ্টি কৰা হৈছে।’
উল্লেখ্য যে, ৰাজপাল যাদৱে কেইবাখনো জনপ্ৰিয় হিন্দী ছবিত অভিনয় কৰি দৰ্শকৰ মন মুহিবলৈ সক্ষম হৈছে।
