APSC কেলেংকাৰীৰ মূল খলনায়ক ৰাকেশ পালক ১৪ বছৰৰ কাৰাদণ্ড আদালতৰ। বিশেষ ন্যায়ধীশ আদালতে ১৪ বছৰৰ কাৰাদণ্ড বিহিলে ৰাকশ পালক। লগতে, ২ লাখ টকাৰ জৰিমনা বিহিলে ৰাকেশ পালক।
একেদৰে ৰাকেশ পালৰ সহযোগী ছামেদুৰ ৰহমান আৰু বসন্ত দলেক ১০ বছৰৰ কাৰাদণ্ড বিহাৰ লগতে ৫০ হাজাৰ টকাৰ জৰিমনা বিহিলে বিশেষ আদালতে।
একেদৰে, আদালতে দোষী সাব্যস্ত কৰা ২৯ গৰাকী অভিযুক্তক ৪ বছৰৰ কাৰাদণ্ড বিহিলে বিশেষ ন্যায়ধীশ আদালতে। আদালতে দোষী সাব্যস্ত কৰা অন্য ২৯ গৰাকী লোক ক্ৰমে, সংঘমিত্ৰা শ্যাম, কবীন কিল্লিংপি, সত্যনাথ ডেকা, শ্বাহিদ আজিজ হক, বিশ্বজিত দলে, ৰৌচন ৰইফ, দীপাংক বাৰিক, বিদ্যুৎ কুমাৰ দাস, ঋতুৰাজ সোণোৱাল, অল্পনা ডেউৰী, প্ৰিয়ংকা বৰা, বৰ্ণালী মেধি, ছুইটি বৰা হাজৰিকা, মফিদা বেগম শইকীয়া, প্ৰীতি দাস, কেশৱানন্দ বৰা, অঞ্জন লয়িং, জয়ন্ত জিৎ দাস, কল্যাণ শৰ্মা, প্ৰণৱ ভৰালী, বিপুল কুমাৰ ডেকা, কমল কৃষ্ণ দাস, জ্যোতি ৰেখা দাস, অলক কুমাৰ মালী, ফণীন্দ্ৰ শইকীয়া, প্ৰাঞ্জল বৰ্মন, জয়ন্ত চাবুকধৰ, বৈচিত্ৰ হাকমাওচা, ৰোষেশ্বৰ টিমুৎ।
APSC ৰ কৃষি উন্নয়ন বিষয়া নিযুক্তি কেলেংকাৰীৰ ভঙাগড় থানাৰ ১৫৯/১৭ গোচৰত দোষী সাব্যস্ত হৈছিল ৰাকেশ পালসহ ৩২জন লোক। APSCৰ কৃষি উন্নয়ন বিষয়া নিযুক্তি কেলেংকাৰী গোচৰৰ ২২ জুলাইত চূড়ান্ত ৰায়দান দিছিল আদালতে।
উল্লেখ্য যে, ২০১৬ চনৰ ৪ নৱেম্বৰত APSC কাৰ্যালয়ৰ পৰা ৰাকেশ পালক গ্ৰেপ্তাৰ কৰা হৈছিল। সেই সময়ত কেলেংকাৰী গোচৰৰ তদন্তকাৰী বিষয়া হিচাপে দায়িত্বত আছিল ডিব্ৰুগড় জিলাৰ তদানীন্তন অতিৰিক্ত আৰক্ষী অধীক্ষক সুৰজিৎ সিং পানেছাৰ।
অতিৰিক্ত আৰক্ষী অধীক্ষকগৰাকীৰ নেতৃত্বতেই ৰাকেশ পালৰ লগতে কেলংকাৰীৰ সৈতে জড়িত বহুতো ৰাজপত্রিত বিষয়াক গ্ৰেপ্তাৰ কৰা হৈছিল। তেতিয়াৰ পৰাই আদালতত বিচাৰধীন হৈ আছিল গোচৰ।
অকল ইমানেই নহয় অসম লোকসেৱা আয়োগৰ অধ্যক্ষ হৈ থাকোতে আয়োগৰ বৰঘৰত চাকৰিৰ বজাৰ মেলিছিল ৰাকেশ পাল বাহিনীয়ে। দুৰ্নীতিৰ সদাগৰ ৰাকেশ পালক গ্ৰেপ্তাৰৰ পাছত আয়োগৰ সদস্য-পৰীক্ষাৰ নিয়ন্ত্ৰক গ্ৰেপ্তাৰ হৈছিল ডিব্ৰুগড় আৰক্ষীৰ হাতত। পৰৱৰ্তী পৰ্যায়ত তদন্তকাৰী আৰক্ষীয়ে ৰাকেশ পালৰ পৰা চাকৰি ক্ৰয় কৰা ৬০ জন বিষয়া, দালাল, মধ্যভোগীক গ্ৰেপ্তাৰ কৰিছিল।
ইফালে ডিব্ৰুগড় আৰক্ষীৰ হাতত বন্দী হৈ থকাৰ সময়তে পুনৰ এ পি এছ চিৰ অধীনৰ কৃষি উন্নয়ন বিষয়া নিযুক্তি কেলেংকাৰীত ৰাকেশ পালৰ বিৰুদ্ধে ভঙাগড় থানাত ১৫৯/১৭ নম্বৰত গোচৰ ৰুজু হৈছিল।
