ব’ৰ্ডাৰ-গাভাস্কাৰ ট্ৰফীৰ পঞ্চম তথা অন্তিমখন টেষ্ট কাইলৈৰ পৰা আৰম্ভ হ’ব। ছিডনীত অনুষ্ঠিত হ’বলগীয়া এই মেচখনৰ পূৰ্বে প্ৰকাশ পাইছে এটা ডাঙৰ খবৰ। অষ্ট্ৰেলিয়াৰ বিৰুদ্ধে ২-১ত পিছ পৰি থকা শৃংখলাটোৰ অন্তিমখন মেচত নেখেলে অধিনায়ক ৰোহিত শৰ্মাই।
কেৱল ৰোহিত শৰ্মাই নহয় আঘাতৰ বাবে এই মেচখনত আকাশদ্বীপেও খেলিব নোৱাৰে। আকাশদ্বীপৰ ঠাইত দলে মূল একাদশত স্থান দিছে প্ৰসিদ্ধ কৃষ্ণাক। এই মেচখনত যশস্বী জয়ছোৱালৰ লগত ইনিংছ মুকলি কৰিব কে এল ৰাহুলে। ইফালে ৰোহিত শৰ্মাৰ ঠাইত দললৈ প্ৰত্যাৱৰ্তন ঘটিছে শুভমন গিলৰ।
ছিডনী টেষ্টত পুনৰবাৰ ভাৰতীয় দলে দুজন স্পিনাৰৰ সৈতে খেলপথাৰত অৱতীৰ্ণ হ’ব। দলে দুজন স্পিনাৰ ক্ৰমে ৰবীন্দ্ৰ জাদেজা আৰু ৱাশ্বিংটন সুন্দৰক দলত স্থান দিয়াৰ বিপৰীতে জশপ্ৰীত বুমৰাহ, মহম্মদ ছিৰাজ আৰু প্ৰসিদ্ধ কৃষ্ণাই বেগী বলাৰৰ ভূমিকা গ্ৰহণ কৰিব।
ৰোহিত শৰ্মাৰ অনুপস্থিতিত অষ্ট্ৰেলিয়াৰ বিৰুদ্ধে খেলিবলগীয়া অন্তিমখন মেচত জশপ্ৰীত বুমৰাহে পুনৰ এবাৰ ভাৰতীয় দলক নেতৃত্ব প্ৰদান কৰিব। বুমৰাহৰ অধিনায়কত্বতে ভাৰতে এই শৃংখলাটোৰ প্ৰথমখন মেচত জয়ী হৈছিল।
পঞ্চম টেষ্টৰ বাবে ভাৰতীয় দলৰ মূল একাদশ
যশস্বী জয়ছোৱাল, কে এল ৰাহুল, শুভমন গিল, বিৰাট কোহলী, ঋষভ পন্ত, ৰবীন্দ্ৰ জাদেজা, নিতীশ ৰেড্ডী, ৱাশ্বিংটন সুন্দৰ, জশপ্ৰীত বুমৰাহ, মহম্মদ ছিৰাজ, প্ৰসিদ্ধ কৃষ্ণা।
