বলীউদৰ ছুপাৰষ্টাৰ ছলমান খান সন্দৰ্ভত আহিছে এক ডাঙৰ খবৰ। মুম্বাইৰ দাদৰ অঞ্চলত চলি থকা এখন ছবিৰ শ্বুটিঙৰ সময়ত এজন অচিনাক্ত লোকে ছলমানৰ শ্বুটিংস্থলীত প্ৰৱেশ কৰা ঘটনাই তীব্ৰ চাঞ্চল্যৰ সৃষ্টি কৰে।
নিৰাপত্তা বেষ্টনীৰ চকুত ধূলি দি শ্বুটিংস্থলীত প্ৰৱেশ কৰা লোকজনে গেংষ্টাৰ লৰেন্স বিষ্ণোইৰ নাম লৈ দাবী ধমকি প্ৰদান কৰে। লোকজনে প্ৰথমে শ্বুটিংস্থলীত নিয়োজিত হৈ থকা সুৰক্ষা কৰ্মীৰ সৈতে বাক বিতণ্ডাত লিপ্ত হয় আৰু পৰিস্থিতি নিয়ন্ত্ৰণৰ বাহিৰত যোৱা দেখি লোকজনে সুৰক্ষা কৰ্মীসকলক উদ্দেশ্য কৰি কয় ‘বিষ্ণোইক কৈ দিও নেকি?’
লোকজনৰ দাবী ধমকি দেখি শ্বুটিংস্থলীত একপ্ৰকাৰ হাহাকাৰময় পৰিৱেশৰ সৃষ্টি হয় আৰু লগে লগে সুৰক্ষা কৰ্মীসকলে লোকজনক আটক কৰি আৰক্ষীক চমজাই দিয়ে।
এই ঘটনাৰ পিছত আৰক্ষীয়ে লোকজনক মুম্বাই শিৱাজী পাৰ্ক আৰক্ষী থানালৈ লৈ আনি সোধা-পোচা অব্যাহত ৰাখিছে। আৰক্ষীৰ এজন শীৰ্ষ বিষয়াই এই ঘটনাৰ বিষয়ে জানিব দিয়ে। অৱশ্যে ঘটনাৰ সবিশেষ এতিয়াও পোহৰলৈ অহা নাই।
উল্লেখ্য যে, যোৱা মাহত ছলমান খানক মৃত্যুৰ ভাবুকি প্ৰদান কৰাৰ অভিযোগত আৰক্ষীয়ে কৰ্ণাটকৰ পৰা এজন লোকক গ্ৰেপ্তাৰ কৰিছিল। মৃত্যুৰ ভাবুকিৰ লগতে পাঁচ কোটি টকা দাবী কৰা লোকজনক ভেংকটেশ নাৰায়ণ বুলি চিনাক্ত কৰিছিল।
স্মৰ্তব্য যে, বিগত কিছু মাহৰ পৰা কুখ্যাত গেংষ্টাৰ লৰেন্স বিষ্ণোইৰ নাম লৈ ছলমান খানক মৃত্যুৰ ভাবুকি প্ৰদান কৰি থকা হৈছে। চলিত বৰ্ষৰে এপ্ৰিল মাহত ছলমান খানৰ বান্দ্ৰাস্থিত বাসগৃহৰ বাহিৰত কোনোবা দুৰ্বৃত্তই গুলীচালনা কৰাৰ পিছৰে পৰা বৃদ্ধি কৰা হৈছিল অভিনেতাজনৰ নিৰাপত্তা।
বাৰে বাৰে মৃত্যুৰ ভাবুকি লাভ কৰি থকাৰ পিছতে অভিনেতা ছলমান খানক চৰকাৰৰ তৰফৰ পৰা ৱাই প্লাছ কেটেগৰী নিৰাপত্তা প্ৰদান কৰিছিল। শেহতীয়াকৈ বাবা ছিদ্দিকীক হত্যা কৰা ঘটনাৰ পিছৰে পৰা আৰু অধিক বৃদ্ধি কৰা হৈছে ছলমান খানৰ নিৰাপত্তা।
