ছৌদি আৰবে প্ৰতি বছৰে হজৰ বাবে প্ৰস্তুতি চলায় যদিও ২০২৫ চনত এই প্ৰস্তুতি বিশেষ। এইবাৰ ছৌদি আৰৱৰ গৃহ মন্ত্ৰালয়ে তীৰ্থযাত্ৰীৰ সংখ্যা, নিৰাপত্তা আৰু ভিৰ নিয়ন্ত্ৰণৰ সন্দৰ্ভত এক নতুন নিৰ্দেশনা জাৰি কৰিছে।
এই নিয়মসমূহে কেৱল তীৰ্থযাত্ৰীসকলৰ সুৰক্ষা নিশ্চিত কৰাই নহয়, মক্কাৰ স্থানীয় ব্যৱস্থাত ভাৰসাম্য ৰক্ষা কৰাতো সহায় কৰে।
চৌদি আৰৱৰ গৃহ মন্ত্ৰালয়ৰ মতে, উমৰাহৰ বাবে ছৌদি আৰৱত প্ৰৱেশৰ অন্তিম তাৰিখ ১৩ এপ্ৰিল, ২০২৫ নিৰ্ধাৰণ কৰা হৈছে আৰু সকলো উমৰা হজযাত্ৰীয়ে ২৯ এপ্ৰিলৰ ভিতৰত ঘূৰি আহিব লাগিব।এই সময়সীমা নিৰ্ধাৰণ কৰা হৈছে যাতে হজৰ সময়ত ভিৰ আৰু বিশৃংখলতাৰ পৰা হাত সাৰিব পৰা যায়।
হজ ২০২৫ৰ বাবে ছৌদি আৰব চৰকাৰে এনে এক পদক্ষেপ গ্ৰহণ কৰিছে যিয়ে হাজাৰ হাজাৰ ভাৰতীয় পৰিয়ালক প্ৰভাৱিত কৰিব পাৰে।ইয়াৰে এটা হল এতিয়া ১২ বছৰৰ তলৰ শিশুৱে নাপাব হজ ভিছা। এই তথ্য ভাৰতৰ হাজ কমিটি, মুম্বাইৰ দ্বাৰা জাৰি কৰা বিজ্ঞপ্তিযোগে দিয়া হৈছে। এই নিয়মৰ আটাইতকৈ প্ৰত্যক্ষ প্ৰভাৱ সেই পৰিয়ালসমূহৰ ওপৰত পৰিব, যিবোৰে নিজৰ সন্তানৰ সৈতে যাত্ৰা কৰাৰ পৰিকল্পনা কৰিছিল। ইতিমধ্যে উত্তৰ প্ৰদেশৰ ১৮ টা শিশুৰ নামকে ধৰি সমগ্ৰ দেশৰ পৰা অহা শিশুৰ মুঠ ২৯১ খন আৱেদন নাকচ কৰা হৈছে।
২০২৫ চনৰ ২৩ এপ্ৰিলৰ পৰা মক্কাত প্ৰৱেশ কৰাসকলৰ বাবে অতি কঠোৰ নিয়ম ৰূপায়ণ কৰা হৈছে।এতিয়া যিকোনো ব্যক্তিয়ে মক্কাত প্ৰৱেশৰ বাবে কোনো এখন নথি দেখুৱাব বাধ্যতামূলক হ’ব, য’ত হজ পাৰ্মিট, মক্কাত কাম কৰাৰ চৰকাৰী অনুমতি, মক্কা বাসিন্দাৰ বাবে অনুমোদিত পৰিচয় পত্ৰ আদি অন্তৰ্ভুক্ত। নতুন আইন অনুসৰি এই নথি-পত্ৰ অবিহনে মক্কাত প্ৰৱেশ কৰিলে আল ছুমাইছি বা অন্যান্য চেকপইণ্টৰ পৰা ঘূৰাই পঠিওৱা হ’ব। বিশেষকৈ দেশৰ অন্য প্ৰান্তৰ পৰা পৰ্যটন ভিছা বা কৰ্মসূত্ৰে মক্কালৈ অহা লোকসকলৰ ক্ষেত্ৰত এই কঠোৰ নিয়ম প্ৰযোজ্য।
ছৌদি আৰৱৰ গৃহ মন্ত্ৰালয়ে স্পষ্ট কৰি দিছে যে যিসকলৰ হজ ভিছা নাই তেওঁলোকক ২০২৫ চনৰ ২৯ এপ্ৰিলৰ পিছত মক্কাত প্ৰৱেশ বা থাকিবলৈ দিয়া নহ’ব।ইয়াৰ উপৰিও কামৰ বাবে মক্কা বা ইয়াৰ আশে-পাশে থকা অঞ্চললৈ অহা বিদেশীয়ে অনুমতিৰ বাবে অনলাইন আবেদন কৰাটো বাধ্যতামূলক হ’ব।
