চীনত অনুষ্ঠিত হোৱা ছাংহাই সহযোগিতা সংস্থাৰ সন্মিলনৰ সময়ত দেখা যায় এক আকৰ্ষণীয় দৃশ্য। প্ৰধানমন্ত্ৰী নৰেন্দ্ৰ মোদী, চীনৰ ৰাষ্ট্ৰপতি ছি জিনপিং, ৰাছিয়াৰ ৰাষ্ট্ৰপতি ভ্লাদিমিৰ পুটিন, পাকিস্তানৰ প্ৰধানমন্ত্ৰী শ্বাহবাজ শ্বৰীফকে ধৰি অন্যান্য নেতাক একেটা মঞ্চতে দেখা যায়।
তিয়ানজিনত আনুষ্ঠানিক আদৰণি অনুষ্ঠানৰ সময়ত এই নেতাসকলক ফটো ফ্ৰেমত থিয় হৈ থকা দেখা গৈছিল। এতিয়া এই ছবিখন সমগ্ৰ বিশ্বতে ক্ৰমান্বয়ে ভাইৰেল হৈ পৰিছে আৰু ৰাজনৈতিক বিশ্লেষকসকলে ইয়াৰ অৰ্থ বিচাৰিবলৈ আৰম্ভ কৰিছে। কোৱা হৈছে যে এই এখন ছবিয়ে আমেৰিকাকে ধৰি অন্যান্য শক্তিশালী দেশসমূহক এক শক্তিশালী বাৰ্তা প্ৰদান কৰিছে।
ছাংহাই সহযোগিতা সংস্থা (SCO) হৈছে ইউৰেছিয়াৰ এটা ৰাজনৈতিক, অৰ্থনৈতিক আৰু নিৰাপত্তা সংস্থা। ২০০১ চনত ছাংহাইত ৰাছিয়া, চীন, কাজাখস্তান, কিৰ্গিস্তান, তাজিকিস্তান আৰু উজবেকিস্তানে প্ৰতিষ্ঠা কৰিছিল। পিছলৈ ২০১৭ চনত ভাৰত আৰু পাকিস্তান পূৰ্ণ সদস্য হোৱাৰ বিপৰীতে ইৰাণে ২০২৩ চনত যোগদান কৰে।এছ চি অ’ৰ মূল উদ্দেশ্য হৈছে আঞ্চলিক নিৰাপত্তা, সন্ত্ৰাসবাদ, বিচ্ছিন্নতা আৰু উগ্ৰবাদৰ বিৰুদ্ধে সহযোগিতা, অৰ্থনৈতিক উন্নয়ন, বাণিজ্য আৰু সাংস্কৃতিক বিনিময়। সংস্থাটোৱে সদস্য দেশসমূহৰ মাজত সামৰিক সহযোগিতা, যৌথ অনুশীলন আৰু চোৰাংচোৱাৰ বিনিময়ত গুৰুত্ব আৰোপ কৰে। এছচিঅ’ৰ মুখ্য কাৰ্যালয় বেইজিঙত আৰু ইয়াৰ চৰকাৰী ভাষা ৰাছিয়ান আৰু চীনা ভাষা।
এছ চি অ’ শীৰ্ষ সন্মিলনৰ আঁৰত অনুষ্ঠিত হোৱা আলোচনাৰ সময়ত মোডী আৰু জিনপিঙে এই কথাত সন্মতি প্ৰকাশ কৰে যে দুয়োখন দেশ প্ৰতিদ্বন্দ্বী নহয় বৰঞ্চ উন্নয়নৰ অংশীদাৰ। দুয়োপক্ষৰ মাজত থকা মতানৈক্য বিবাদলৈ পৰিণত হ’ব নালাগে বুলিও তেওঁলোকে জোৰ দিয়ে। আমেৰিকাৰ শুল্ক নীতিৰ ফলত সৃষ্টি হোৱা অৰ্থনৈতিক অস্থিৰতাৰ মাজতে বিশ্ব বাণিজ্য সুস্থিৰ কৰাৰ ক্ষেত্ৰত তেওঁলোকৰ অৰ্থনীতিৰ ভূমিকাকো স্বীকাৰ কৰে দুয়োগৰাকী নেতাই।
