বিগত কেইবাদিনো ধৰি হোৱা নেৰানেপেৰা বৰষুণৰ ফলত পঞ্জাৱত বানে ধাৰণ কৰিছে ভয়ংকৰ ৰূপ। পৰিস্থিতি ইমানেই জটিল ৰূপ ধাৰণ কৰিছে যে বানত সৰ্বস্বান্ত হোৱা বহু লোকে নিজৰ ঘৰ-দুৱাৰ এৰি নিৰাপদ স্থানলৈ ঢাপলি মেলিবলৈ বাধ্য হৈছে।
ৰাজ্যখনত দেখা দিয়া এই সংকটময় পৰিস্থিতিৰ সৈতে মোকাবিলা কৰিবলৈ আগবাঢ়ি আহিছে বলিউডৰ তাৰকা অভিনেতা শ্বাহৰুখ খান। পঞ্জাৱৰ স্থানীয় বেচৰকাৰী সংস্থাৰ সৈতে মিলি অভিনেতাগৰাকীয়ে বানত ক্ষতিগ্ৰস্ত লোকসকলক সহায় আগবঢ়াই আছে।
মীৰ ফাউণ্ডেশ্যন নামৰ এটা এনজিঅ’ৰ সৈতে মিলি শ্বাহৰুখ খানে বানত ক্ষতিগ্ৰস্ত লোকসকলক প্ৰয়োজনীয় খাদ্য সামগ্ৰী, ঔষধ, ফল্ডিং বিচনাৰ লগতে আন বহু অত্যৱশ্যকীয় সামগ্ৰী প্ৰদান কৰে। এই সাহায্য অভিযান অমৃতসৰ, পাটিয়ালা, ফাজিল্কা আৰু ফিৰোজপুৰৰ প্ৰায় ১,৫০০ পৰিয়ালৰ মাজত বিতৰণ কৰে।
এই প্ৰাকৃতিক দুৰ্যোগক লৈ অভিনেতা শ্বাহৰুখ খানে নিজৰ ছ’চিয়েল মিডিয়া একাউণ্টত লিখিছিল, ‘পঞ্জাৱৰ এই ভয়ংকৰ বানপানীত ভুগি থকা সকলো লোকৰ বাবে মই দুঃখিত। মই তেওঁলোকৰ বাবে মোৰ প্ৰাৰ্থনা আৰু শক্তি প্ৰেৰণ কৰিছো। ভগৱান আপোনালোক সকলোৰে লগত থাকক।’
