ছিপাঝাৰত সংঘটিত হৈছে ৰাজ্য জোকাৰি যোৱা ত্ৰিপ’ল মাৰ্ডাৰৰ ঘটনা। এটা পৰিয়ালৰ ৩জনকৈ সদস্যক অচিনাক্ত দুৰ্বৃত্তই নৃশংসভাৱে হত্যা কৰা গৈছে।
ছিপাঝাৰৰ নাৰিকলিত সংঘটিত হৈছে এই শিহৰণকাৰী ঘটনা। নৃশংস হত্যাৰ বলি হৈছে একেটা পৰিয়ালৰ তিনিজন। ১১ ছেপ্তেম্বৰৰ সন্ধিয়া ভাগত সংঘটিত হয় এই ঘটনা। পত্নী-পুত্ৰৰ মৃতদেহ কোঠাৰ মজিয়াত আৰু স্বামী দীপক নাথৰ মৃতদেহ চোতালত উদ্ধাৰ হয়। কোনে কি কাৰণে এই কাণ্ড সংঘটিত কৰিলে জানিব পৰা হোৱা নাই।
জানিব পৰা মতে, পিতৃগৃহৰ পৰা প্ৰায় ৮০০ মিঃ দূৰত্বত সুকীয়াকৈ ঘৰ পাতি পত্নী-পুত্ৰসহিতে ১০ বছৰ ধৰি বাস কৰিছিল। ঘটনা সন্দৰ্ভত দীপক নাথৰ ভাতৃয়ে কয় যে, উক্ত দিনটোত তেওঁ দিনৰ ভাগত জ্যেষ্ঠ ভাতৃক ফোনযোগে সংযোগ স্থাপন কৰিব বিচাৰে যদিও তেওঁ সহাৰি নাপালে। ইয়াৰ পিছত বৌয়েক নাথৰ সৈতে সংযোগ স্থাপন কৰিব বিচাৰি ব্যৰ্থ হয়। পিছলৈ সন্ধিয়া তেওঁ যেতিয়া ককায়েকৰ ঘৰত আহি উপস্থিত হয়, তেতিয়া গেটৰ ভিতৰৰ পৰাই তলা লগাই থোৱা দেখিবলৈ পায়।
তাৰ পিছত তেওঁৰ মনত কিছু সন্দেহ হয় আৰু তেওঁ দেৱাল পাৰ কৰি আহি ঘৰৰ চৌহদতে জ্যেষ্ঠ ককায়েকৰ মৃতদেহ দেখিবলৈ পায়। ইয়াৰ পিছতে লাগে হৈ-চৈ। সকলো ওচৰ-চুবুৰীয়া আহি উপস্থিত হয়। পিছত ঘৰৰ ভিতৰলৈ গৈ দীপক নাথৰ পত্নী তথা সপ্তম শ্ৰেণীত অধ্যয়নৰত পুত্ৰৰ মৃতদেহ ৰক্তাক্ত অৱস্থাত প্ৰত্যক্ষ কৰে। ইয়াৰ পিছতে আৰক্ষীক খবৰ দিয়া হয়। নিশাই চিআইডি আৰু ফৰেন্সিক দল উপস্থিত হৈ আৰম্ভ কৰে তদন্ত।
এতিয়া প্ৰশ্ন উত্থাপন হৈছে যে, যদি তেওঁলোক তিনিওকে হত্যাই কৰা হৈছে, গেটৰ ভিতৰৰ পৰা তলা লগালে কোনে? এইয়া কোনো ডকাইতি নে কোনো ষড়যন্ত্ৰৰ বলি হৈছে এই পৰিয়ালটো? কিয়নো ঘৰৰ ভিতৰত কোনোধৰণৰ ক্ষয়-ক্ষতি দেখিবলৈ পোৱা নাযায়। এই ঘটনাই সৃষ্টি কৰিছে হাজাৰটা প্ৰশ্নৰ। বৰ্তমান সমগ্ৰ ঘটনাটো ৰহস্যৰ আৱৰ্তত। গতিকে আৰক্ষীক উচিত তদন্ত কৰি দোষীক উপযুক্ত শাস্তি বিহিবলৈ আহ্বান জনাইছে পৰিয়ালটোৰ আত্মীয় লোকে।
