সন্দেহজনক নাগৰিকৰ বিৰুদ্ধে অভিযান অব্যাহত থকাৰ মাজতে এইবাৰ শিৱসাগৰত চলিল নাৰী দেহৰ ব্যৱসায়ৰ বিৰুদ্ধে অভিযান। শিৱসাগৰৰ লক্ষেশ্বৰ গগৈ পথৰ এটা কোচ ৰাজবংশী ছাত্ৰ সন্থা আৰু চিলাৰায় সেনাই যৌথভাৱে চলোৱা অভিযানত দেহ ব্যৱসায়ী চক্ৰটো উৎখাত কৰিবলৈ সক্ষম হয়।
গণকপট্টীৰ এটা বাসগৃহত দীৰ্ঘদিন ধৰি এটা চক্ৰই দেহ ব্যৱসায় চলাই আহিছিল। জনসাধাৰণৰ অজ্ঞাতে এই ব্যৱসায় চলাই অহাৰ অভিযোগ উত্থাপন হোৱাৰ পিছতে জনগোষ্ঠীয় সংগঠন দুটাৰ দুজন সদস্যই নিজে গ্ৰাহক হিচাপে উক্ত স্থানত প্ৰৱেশ কৰাৰ পাছতে সমগ্ৰ ঘটনা উন্মোচিত হয়।
গ্ৰাহক হিচাপে যোৱা সদস্য দুজনক দুটা কোঠাত দুজনী যুৱতী যোগান ধৰাত তাৰে এজন সদস্যই কৌশলেৰে বাসগৃহটোৰ পৰা ওলাই আহি সতীৰ্থ সদস্য সকলক খবৰ দিয়ে।
গ্ৰাহকক নাৰী যোগান ধৰা আজিজুল নামৰ এজন দালালক উক্ত স্থানতে সংগঠনটোৰ সদস্য সকলে কৰায়ত্ত কৰে। আজিজুলৰ ভাষ্য অনুসৰি শিৱসাগৰ নগৰৰ মাজমজিয়াত থকা এখন পাৰ্লাৰৰ সৈতে তেঁওৰ যোগাযোগ আছিল আৰু তাৰ পৰাই দেহ ব্যৱসায় চক্ৰটো নিয়ন্ত্ৰিত হৈছিল।
আজিজুল নামৰ দালালটোক কৰায়ত্ত কৰাৰ সময়তে বাসগৃহটোৰ ভিতৰৰ পৰা এগৰাকী মহিলাই হাতত চোকা অস্ত্ৰ লৈ সকলোকে আক্ৰমনৰ চেষ্টা চলায়।
ইফালে দালাল আজিজুলৰ ফোনত বহু যুৱতীৰ আপত্তিজনক ফটো উদ্ধাৰ হৈছে। দীৰ্ঘদিন ধৰি অনৈতিক কাৰ্য চলাই অহা আজিজুলক সংগঠন দুটাই আৰক্ষীক চমজাই দিয়ে।
