প্ৰচণ্ড বৰষুণ আৰু ঘূৰ্ণীবতাহৰ ফলত সৃষ্টি হোৱা বানপানীয়ে শ্ৰীলংকাৰ স্বাভাৱিক জীৱনত ভয়াৱহ প্ৰভাৱ পেলাইছে। দুৰ্যোগ ব্যৱস্থাপনা কেন্দ্ৰৰ তথ্য অনুসৰি, এই ঘূৰ্ণীবতাহৰ বাবে এই পৰ্যন্ত ১২৩ জন লোকৰ মৃত্যু হোৱাৰ বিপৰীতে ১৩০ জন লোক এতিয়াও সন্ধানহীন হৈ আছে।
প্ৰবল বৰষুণ আৰু ভূমিস্খলনে শ্ৰীলংকাৰ বহু ঠাইত ক্ষতিগ্ৰস্ত কৰিছে, যাৰ ফলত লাখ লাখ লোক ক্ষতিগ্ৰস্ত হৈছে। শ্ৰীলংকাৰ বিষয়াসকলে কয় যে, সশস্ত্ৰ বাহিনীৰ সহায়ত সাহায্যৰ কাম চলি আছে আৰু এতিয়ালৈকে ঘৰ ধ্বংস হোৱা ৪৩৯৯৫ জন লোকক চৰকাৰী কল্যাণ কেন্দ্ৰলৈ স্থানান্তৰ কৰা হৈছে। শ্ৰীলংকা চৰকাৰে সামৰিক হেলিকপ্টাৰ আৰু নাও ব্যৱহাৰ কৰি আৱদ্ধ হৈ থকা লোকসকলক উদ্ধাৰৰ চেষ্টা চলাইছে।
শুকুৰবাৰে দিটৱাহা ঘূৰ্ণীবতাহৰ ফলত উত্তৰ আৰু মধ্য শ্ৰীলংকাত প্ৰচণ্ড বৰষুণ আৰু ভূমিস্খলনৰ সৃষ্টি হয়। প্ৰচণ্ড বৰষুণৰ ফলত প্ৰায় ৪৪ হাজাৰ লোক ক্ষতিগ্ৰস্ত হোৱাৰ ফলত বহু লোকে অস্থায়ী সাহায্য শিবিৰলৈ স্থানান্তৰিত হ’বলগীয়া হয়। বহু অঞ্চলত পানী জমা হোৱাৰ ফলত ৰাজহুৱা সেৱাত ব্যাঘাত জন্মিছিল আৰু আন্তঃগাঁথনিৰ ভয়াৱহ ক্ষতিসাধন হৈছিল। শ্ৰীলংকাৰ সামৰিক বাহিনী আৰু আৰক্ষীয়ে উদ্ধাৰ আৰু সাহায্য অভিযান তীব্ৰতৰ কৰি তুলিছে।
কলম্বোৰ পৰা প্ৰায় ২২০ কিলোমিটাৰ উত্তৰ-পূবৰ প’ল’নাৰুৱাৰ এখন দলঙত আৱদ্ধ হৈ থকা ১৩ জন লোকক হেলিকপ্টাৰেৰে উদ্ধাৰ কৰে। বিষয়াসকলে জনোৱা মতে, ধাৰাসাৰ বৰষুণৰ ফলত বান্দৰনাইকে আন্তঃৰাষ্ট্ৰীয় বিমানবন্দৰৰ কাৰ্য্যকলাপত প্ৰভাৱ পৰাৰ বাবে ত্ৰিবেন্দ্ৰম আৰু কোচিন বিমানবন্দৰলৈ ১৫খন বিমান চলাচল কৰিবলগীয়া হয়।
ইফালে দিটৱাহা ঘূৰ্ণীবতাহৰ ফলত ক্ষতিগ্ৰস্ত শ্ৰীলংকাক মানৱীয় সাহায্য প্ৰদানৰ বাবে ভাৰতে আৰম্ভ কৰিছে অপাৰেচন সাগৰ বন্ধু। এই পদক্ষেপৰ অংশ হিচাপে ভাৰতীয় বায়ুসেনাৰ এখন বিমানে টাৰ্পলিন, কম্বল, পৰিষ্কাৰ-পৰিচ্ছন্নতাৰ কিট, খাদ্য সামগ্ৰী, আৰু অন্যান্য অত্যাৱশ্যকীয় সামগ্ৰীকে ধৰি প্ৰায় ১২ টন সাহায্য সামগ্ৰী লৈ শ্ৰীলংকাত উপস্থিত হয়। ভাৰতীয় নৌসেনাই সাহায্য সামগ্ৰীও প্ৰেৰণ কৰে। আই এন এছ বিক্ৰান্ত আৰু আই এন এছ উদয়গিৰিৰ পৰা প্ৰায় ৪.৫ টন শুকান ৰেচন আৰু ২ টন সতেজ ৰেচন প্ৰেৰণ কৰা হয়। এই সাহায্য ভাৰত চৰকাৰে নিজৰ নেইবাৰহুড ফাৰ্ষ্ট নীতিৰ অধীনত প্ৰেৰণ কৰে, আৰু ভাৰতে শ্ৰীলংকাৰ পৰিস্থিতিৰ বিকাশৰ লগে লগে অধিক সহায় প্ৰেৰণ কৰাৰ প্ৰতিশ্ৰুতি দিছে।
