দেশৰ ৰাজধানী দিল্লীৰ মজনু কা টিলাত বাস কৰি থকা প্ৰায় ৮০০ গৰাকী পাকিস্তানী হিন্দু শৰণাৰ্থীক আঁতৰোৱাৰ নিৰ্দেশত স্থগিতাদেশ জাৰি কৰিছে সৰ্বোচ্চ ন্যায়ালয়ে। ইয়াৰ পূৰ্বে দিল্লী উচ্চ ন্যায়ালয়ে এই লোকসকলক মজনু কা টিলাৰ পৰা আঁতৰোৱাৰ নিৰ্দেশ প্ৰদান কৰিছিল।
এই সন্দৰ্ভত ন্যায়াধীশ এমএম সুন্দৰেশ আৰু ন্যায়াধীশ কোটিশ্বৰ সিঙৰ বিচাৰপীঠে কেন্দ্ৰীয় চৰকাৰ আৰু দিল্লী উন্নয়ন প্ৰাধিকৰণলৈ জাননী জাৰি কৰি ২০২৫ চনৰ মে’ মাহত দিল্লী উচ্চ ন্যায়ালয়ে দিয়া নিৰ্দেশনাত স্থগিতাদেশ জাৰি কৰে।
উল্লেখ্য যে, দিল্লী উন্নয়ন প্ৰাধিকৰণে ২০২৪ চনৰ মাৰ্চ আৰু জুলাই মাহত মজনু কা টিলাত থকা শৰণাৰ্থী শিবিৰ খালী কৰিবলৈ জাননী জাৰি কৰিছিল যদিও সেই সময়ত কোনো ধৰণৰ পদক্ষেপ গ্ৰহণ কৰা নাছিল।
কিন্তু ২০২৫ চনৰ জুলাই মাহত পুনৰ শিবিৰ খালী কৰাৰ জাননী জাৰি কৰাত এইবাৰ আশংকা কৰা হৈছিল যে অতি শীঘ্ৰে পাকিস্তানী হিন্দু শৰণাৰ্থীসকলৰ বিৰুদ্ধে ব্যৱস্থা গ্ৰহণ কৰা হ’ব।
অধিবক্তা বিষ্ণু শংকৰ জৈনৰ জৰিয়তে ধৰ্মবীৰ বাগড়ী আৰু আন লোকে উচ্চতম ন্যায়ালয়ত এই আবেদন দাখিল কৰিছিল। উচ্চ ন্যায়ালয়ৰ এই নিৰ্দেশে সংবিধানৰ ২১ নং অনুচ্ছেদ উলংঘা কৰা বুলি উল্লেখ কৰিছে আবেদনকাৰীসকলে।
আবেদনকাৰীসকলে লগতে কৈছিল যে চাদ তথা চাল (ঘৰ-বাৰী) অবিহনে এজন ব্যক্তিৰ মৰ্যাদা থাকিব নোৱাৰে আৰু ইয়াৰ ফলত তেওঁলোকৰ কৰ্মসংস্থাপনৰ অধিকাৰো প্ৰভাৱিত হয়।
উল্লেখ্য যে, পাকিস্তানত ইছলামিক মৌলবাদীৰ অত্যাচাৰৰ পৰা হাত সাৰিবলৈ এই শৰণাৰ্থীসকল ভাৰতলৈ আহিছিল। প্ৰায় ২৫০-২৬০ পৰিয়াল শিবিৰত বসবাস কৰি আছে, ইয়াৰে কিছু সংখ্যকে ভাৰতীয় নাগৰিকত্ব লাভ কৰিছে, বাকীসকলৰ আবেদন প্ৰক্ৰিয়া চলি আছে।
এইসকল লোকৰ অধিকাংশই অতি দৰিদ্ৰ আৰু দৈনিক মজুৰি, শ্ৰম, ঘৰুৱা কাম আদি কৰি জীৱিকা নিৰ্বাহ কৰে। বেছিভাগ লোক অনুসূচিত জাতিৰ।
২০১৯ চনৰ ১২ ডিচেম্বৰ তাৰিখে কাৰ্যকৰী হোৱা নাগৰিকত্ব সংশোধনী আইন (CAA)ক উচ্চ ন্যায়ালয়ে আওকাণ কৰা বুলি উল্লেখ কৰি আবেদনত কোৱা হৈছে যে ২০১৪ চনৰ ৩১ ডিচেম্বৰৰ পূৰ্বে পাকিস্তান, আফগানিস্তান আৰু বাংলাদেশৰ পৰা ভাৰতলৈ অহা হিন্দু, শিখ, বৌদ্ধ, জৈন, পাৰ্চী আৰু খ্ৰীষ্টান সম্প্ৰদায়ৰ লোকসকলক এই আইনৰ জৰিয়তে নাগৰিকত্ব দিয়াৰ ব্যৱস্থা কৰা হৈছে। এই লোকসকলক বলপূৰ্বকভাৱে আঁতৰোৱাটো মানৱ অধিকাৰৰ উলংঘা।
