কলিকতা কাণ্ডৰ চাঞ্চল্য মাৰ নৌযাওতেই পুনৰ এক নিৰ্লজ্জ তথা নৃশংস ঘটনা সংঘটিত হৈছে অসমত। নগাঁও জিলাৰ ধিঙত তিনিজন নৰপিশাচে এগৰাকী কিশোৰীৰ সৈতে সংঘটিত কৰা অমানৱীয় কাণ্ডই লজ্জানত কৰিছে সমগ্ৰ মানৱ জাতিক।
জীৱশ্ৰেষ্ঠ মানুহৰ এনে পাশবিক ঘটনাৰ পিছতে জাঙুৰ খাই উঠিছে ৰাজ্যৰ দল-সংগঠনৰ লগতে মুখ্যমন্ত্ৰী ড০ হিমন্ত বিশ্ব শৰ্মা। অতি শীঘ্ৰে অপৰাধীক কৰায়ত্ব কৰাৰ নিৰ্দেশ প্ৰদান কৰিছে মুখ্যমন্ত্ৰী গৰাকীয়ে।
মুখ্যমন্ত্ৰীৰ নিৰ্দেশৰ পিছতেই ঘটনাস্থলীত উপস্থিত হৈছে আৰক্ষী সঞ্চালক প্ৰধান জিপি সিং। ইয়াৰ সমান্তৰালকৈ ঘটনাৰ বুজ ল’বলৈ উপস্থিত হৈছে ৰাজ্যৰ কেবিনেট মন্ত্ৰী পীযুষ হাজৰিকা।
ঘটনাৰ বিৱৰণ অনুসৰি বৃহস্পতিবাৰে বিয়লি টিউচন কৰি ঘৰলৈ উভতাৰ পথতে সংঘটিত হয় জঘন্য ঘটনাটো। তিনি নৰপিশাচে কিশোৰী গৰাকীৰ সৈতে অপকৰ্ম সংঘটিত কৰি এক নিজান স্থানত মূমুৰ্ষ অৱস্থাত পেলাই থৈ যায়।
এই ঘটনা সংঘটিত হোৱাৰ কিছু সময় পিছতে প্ৰত্যক্ষ কৰে স্থানীয় লোকে। কিন্তু কিশোৰী গৰাকীৰ অসহনীয় শাৰীৰিক অৱস্থা দেখি ততাতৈয়াকে ধিং এফ আৰ ইউ চিকিৎসালয়লৈ নিয়ে যদিও উন্নত চিকিৎসাৰ বাবে নগাঁৱলৈ প্ৰেৰণ কৰা হয়।
ইফালে সমগ্ৰ ঘটনা পোহৰলৈ অহাৰ পিছতেই উত্তেজিত হৈ পৰে স্থানীয় লোকসকল। কিশোৰী গৰাকীৰ ন্যায় বিচাৰি ধিং আঞ্চলিক ছাত্ৰ সন্থাই বন্ধ ঘোষণা কৰে সমগ্ৰ ধিং অঞ্চল। ছাত্ৰ সন্থাৰ ঘোষণাৰ পিছতে শুকুৰবাৰে বন্ধৰ ব্যাপক প্ৰভাৱ পৰে বৃহত্তৰ ধিং অঞ্চলত।
শিক্ষানুষ্ঠান, ব্যৱসায়-বাণিজ্য সকলো পৰিহাৰ কৰি সকলোৱে একেলগে অংশগ্ৰহণ কৰে প্ৰতিবাদী কাৰ্য্যসূচীত। দিনজোৰা কাৰ্যসূচীৰে ধিং অঞ্চলৰ হাজাৰ-হাজাৰ জীয়ৰী-বোৱাৰী, ডেকা-বুঢ়া সমবেত হৈ প্ৰতিবাদী শ্লোগানেৰে কঁপাই তোলে ধিঙৰ আকাশ বতাহ।
ইয়াৰ সমান্তৰালকৈ একেমুখে ধিক্কাৰ জনাই আৰক্ষী প্ৰশাসনক। দোষীক কৰায়ত্ব নকৰা পৰ্যন্ত প্ৰতিবাদ সাব্যস্ত কৰি যাব বুলি হুংকাৰ প্ৰদান কৰে।
তীব্ৰ প্ৰতিবাদৰ মাজতেই মুখ্যমন্ত্ৰী শৰ্মাই এই ঘটনাৰ উচিত তদন্ত কৰি দোষীক শাস্তি প্ৰদান কৰাৰ আশ্বাস প্ৰদান কৰে। ইতিমধ্যে এজন অভিযুক্তক আটক কৰিবলৈ সক্ষম হয় অসম আৰক্ষীয়ে।
