উত্তৰ গোৱাৰ কলংগুট বীচ্চত বুধবাৰে (২৫ ডিচেম্বৰ, ২০২৪) ইঞ্জিন বিকল হোৱাৰ বাবে এখন পৰ্যটকৰে ভৰা নাও দুৰ্ঘটনাত পতিত হয়। এই ঘটনাত এজন লোকৰ মৃত্যু হোৱাৰ লগতে প্ৰায় ২০ জন লোক আহত হয়। আৰক্ষীয়ে প্ৰদান কৰে এই তথ্য।
সংবাদ সংস্থা পিটিআইৰ মতে, লাইফগাৰ্ড ইনচাৰ্জ সঞ্জয় যাদৱে কয়, ‘কলংগুট বীচ্চত এখন নাও দুৰ্ঘটনাত পতিত হয়। এই ঘটনাত আমি ১৩ জন লোকক উদ্ধাৰ কৰিছো। আমি সঠিক সংখ্যা নাজানো, কিন্তু নাওখনৰ তলত আবদ্ধ হৈ থকা একেটা পৰিয়ালৰ প্ৰায় ৬ জন লোকৰ অৱস্থা সংকটজনক।’
বৰ্তমান আৰক্ষীয়ে নাওখন ডুব যোৱাৰ ফলত অস্বাভাৱিক মৃত্যুৰ গোচৰ ৰুজু কৰি দুৰ্ঘটনাটোৰ তদন্ত আৰম্ভ কৰিছে।
বুধবাৰে বিয়লিৰ আশে-পাশে কলংগুট বীচ্চত লাইফগাৰ্ড এজেন্সী দৃষ্টি মেৰিন লাইফছেভাৰ্ছে ২০ জনতকৈ অধিক পৰ্যটকক উদ্ধাৰ কৰে। নাওখনত থকা পৰ্যটকৰ বয়স আছিল ৬ৰ পৰা ৬৫ বছৰৰ ভিতৰত। মহাৰাষ্ট্ৰৰ খেড়ৰ ১৩ জনীয়া এটা পৰিয়ালো আছিল নাওখনত। নাওখনত ২০জনৰো অধিক যাত্ৰী আছিল। জানিব পৰা অনুসৰি বীচ্চৰ পৰা প্ৰায় ৬০ মিটাৰ দূৰত্বত নাওখন ডুব যায়।
