আমেৰিকাই আৰোপ কৰা শুল্কৰ মাজতে ৰাছিয়াৰ উপ-প্ৰধানমন্ত্ৰী দিমিত্ৰী পাত্ৰুশ্বেভ চলিত মাহত নতুন দিল্লীলৈ অহাৰ সম্ভাৱনা আছে। পাত্ৰুছেভ হৈছে কৃষি খণ্ডৰ বিশেষজ্ঞ আৰু তেওঁৰ এই ভ্ৰমণৰ মূল উদ্দেশ্য ভাৰতৰ পৰা মিছামাছ আমদানি আৰু সাৰ যোগান বৃদ্ধি কৰা।
ইফালে আমেৰিকালৈ মিছামাছ সৰ্বাধিক যোগান ধৰা দেশ হৈছে ভাৰত, কিন্তু আমেৰিকাৰ ৰাষ্ট্ৰপতি ড’নাল্ড ট্ৰাম্পে ৫০% শুল্ক আৰোপ কৰাৰ পিছত ভাৰতৰ বাণিজ্যত যথেষ্ট প্ৰভাৱ পৰিছে। বিশেষজ্ঞসকলৰ মতে, ৰাছিয়া ভাৰতীয় মিছামাছ ৰপ্তানিকাৰকৰ বাবে এখন আকৰ্ষণীয় বজাৰ হ’ব পাৰে।
এই ভ্ৰমণৰ সময়ত দিমিত্ৰী পাত্ৰুশ্বেভে দ্বিপাক্ষিক বাণিজ্যিক সম্পৰ্ক সুদৃঢ় কৰাৰ বাবে ভাৰতৰ গুৰুত্বপূৰ্ণ মন্ত্ৰীসকলক সাক্ষাৎ কৰিব পাৰে। ভাৰতীয় মিছামাছৰ সৰ্ববৃহৎ বজাৰ আমেৰিকাত, য’ত বছৰি কোটি কোটি ডলাৰৰ ব্যৱসায় চলি থাকে। অৱশ্যে ট্ৰাম্পৰ শুল্কই এই ব্যৱসায়ত প্ৰভাৱ পেলাইছে। এতিয়া ভাৰতীয় মিছামাছ ৰপ্তানিকাৰকসকলে আমেৰিকাৰ বজাৰত ইকুৱেডৰ, ইণ্ডোনেছিয়া, ভিয়েটনাম আৰু চীনৰ দৰে দেশৰ পৰা কঠোৰ প্ৰতিযোগিতাৰ সন্মুখীন হৈছে। এনে পৰিস্থিতিত ৰাছিয়াৰ মিছামাছৰ বজাৰখন ভাৰতৰ বাবে সকাহৰ পথ হ’ব পাৰে।
ট্ৰাম্প প্ৰশাসনে ভাৰতৰ বিৰুদ্ধে কেইবাটাও শুল্ক আৰোপ কৰিছে, যাৰ ফলত ভাৰতীয় মিছামাছ আমদানিৰ মুঠ শুল্কৰ হাৰ ৫৮%তকৈও অধিক হ’ব পাৰে। আমেৰিকাৰ ৰাষ্ট্ৰপতি ট্ৰাম্পে এতিয়া জি-৭ৰ মিত্ৰ দেশসমূহক ভাৰতৰ ওপৰত শুল্ক আৰোপ কৰিবলৈ দাবী জনাইছে। এই সন্দৰ্ভত শুকুৰবাৰে অনুষ্ঠিত জি-৭ৰ বৈদেশিক মন্ত্ৰীৰ বৈঠকত আমেৰিকাই ভাৰত আৰু চীনৰ বিৰুদ্ধে শুল্ক আৰোপ কৰাৰ প্ৰস্তাৱ আগবঢ়াইছিল।
আমেৰিকাই অভিযোগ কৰিছে যে ভাৰতে ৰাছিয়াৰ পৰা তেল ক্ৰয় কৰি ইউক্ৰেইনত পুটিনৰ যুদ্ধৰ বাবে ধন আগবঢ়াইছে। কিন্তু ভাৰতে এই অভিযোগ নাকচ কৰি কয় যে, সেয়া অন্যায় । ৰাষ্ট্ৰীয় স্বাৰ্থ, বজাৰৰ অৱস্থা আৰু শক্তি সুৰক্ষাৰ বাবে দেশখনে নিজৰ নীতিক ভাৰতে ন্যায্যতা প্ৰদান কৰিছে।
