২০ জানুৱাৰীত আমেৰিকাৰ ড’নাল্ড ট্ৰাম্পে দ্বিতীয়বাৰৰ বাবে আমেৰিকাৰ ৰাষ্ট্ৰপতি হিচাপে শপত গ্ৰহণ কৰে। ইয়াৰ পিছত তেওঁ বহুতো ডাঙৰ আৰু আচৰিত ধৰণৰ সিদ্ধান্ত লয়, যাৰ প্ৰভাৱ কেৱল আমেৰিকাতে নহয় ভাৰতকে ধৰি সমগ্ৰ বিশ্বতে দেখা যায়। এই সিদ্ধান্তসমূহৰ ভিতৰত আছিল শুল্ক, অবৈধ অনুপ্ৰৱেশ, গ্ৰীণলেণ্ড দখল, আৰু বহুতো সিদ্ধান্ত।
ড’নাল্ড ট্ৰাম্পে নিৰ্বাচনী প্ৰচাৰৰ সময়ত দিয়া বহু প্ৰতিশ্ৰুতি পূৰণৰ বাবে নিৰ্ণায়ক পদক্ষেপ গ্ৰহণ কৰে। অৱশ্যে তেওঁৰ বহু সিদ্ধান্তক আদালতত প্ৰত্যাহ্বান জনোৱা হয়।
আমেৰিকাৰ ডেম’ক্ৰেটিক পাৰ্টিৰ জ্যেষ্ঠ কৌশলবিদ জেমছ কাৰ্ভিলে কয় যে, ট্ৰাম্পৰ এই প্ৰশাসনৰ ৩০ দিনতকৈও কম সময়ৰ ভিতৰতে পতন ঘটিব পাৰে। কিয়নো দেশৰ জনসাধাৰণ ট্ৰাম্প প্ৰশাসনক লৈ ভাগৰি পৰিছে।
তেওঁ দাবী কৰে যে, ট্ৰাম্পৰ বহু সিদ্ধান্তই জনসাধাৰণৰ অসন্তুষ্টি বৃদ্ধি কৰিছে। বিশেষকৈ কাৰ্ভিলে অনুপ্ৰৱেশৰ নিষেধাজ্ঞা আৰু হিজড়া অধিকাৰৰ ক্ষেত্ৰত ট্ৰাম্প প্ৰশাসনৰ কাৰ্য্যকলাপক লক্ষ্য কৰি লয়। তেওঁ কয় যে, এই সিদ্ধান্তসমূহে জনসাধাৰণৰ চিন্তা বৃদ্ধি কৰিছে আৰু ইয়াৰ প্ৰভাৱ সমগ্ৰ দেশতে দেখা গৈছে।
ৰাষ্ট্ৰপতি ড’নাল্ড ট্ৰাম্পেও জেমছ কাৰ্ভিলৰ এই দাবীৰ প্ৰতিক্ৰিয়া প্ৰকাশ কৰে। তেওঁ নিজৰ ছ’চিয়েল মিডিয়া প্লেটফৰ্ম “ট্ৰুথ”ত লিখে যে, তেওঁ ৰাষ্ট্ৰপতি নিৰ্বাচনত বিপুল ব্যৱধানত জয়ী হয়, সকলো ছুইং ষ্টেটতেই তেওঁ জয়ী হয়। তেওঁৰ হাতত এতিয়া সৰ্বশ্ৰেষ্ঠ ভোটগ্ৰহণৰ সংখ্যা আছে।
ট্ৰাম্প প্ৰশাসনৰ বহু সিদ্ধান্তক লৈ আমেৰিকাৰ জনসাধাৰণৰ মাজত বিভাজন দেখা গৈছে। কিছুমানে তেওঁৰ কঠোৰ অনুপ্ৰৱেশ আৰু অৰ্থনৈতিক নীতিক সমৰ্থন কৰিলেও বহুতে তেওঁৰ নীতিক সংবেদনহীন আৰু বিভাজনকাৰী বুলি ভাবে। ট্ৰাম্পৰ বহু সিদ্ধান্তকো আদালতত প্ৰত্যাহ্বান জনোৱাৰ ফলত তেওঁৰ নীতিৰ বৈধতাক লৈ প্ৰশ্ন উত্থাপন হৈছে।
