উত্তৰাখণ্ডৰ উত্তৰকাশী জিলাৰ ধৰালী গাঁৱত সংঘটিত হোৱা ভয়াৱহ দুৰ্যোগৰ ৫মটো দিনত আৱদ্ধ হৈ থকা ৪৮০ জন লোকক নিৰাপদে উদ্ধাৰ কৰা হয়। মুখ্যমন্ত্ৰী পুষ্কৰ সিং ধামীয়ে ক্ষতিগ্ৰস্তসকলৰ বাবে সম্ভৱপৰ সকলো সহায় আৰু সকাহ দিয়াৰ কথা ঘোষণা কৰিছে।
বৰ্তমানলৈকে ৪৯ জন লোক নিৰুদ্দেশ হৈ আছে, যাৰ অনুসন্ধানৰ বাবে আইটিবিপি, এনডিআৰএফ, এছডিআৰএফ, জিলা প্ৰশাসন, ড্ৰ’ন, আধুনিক সঁজুলি আৰু ডগ স্কোয়াড নিয়োগ কৰা হৈছে। পুনৰ্বাসন আৰু জীৱিকাৰ বাবে তিনিজনীয়া এখন কমিটীও গঠন কৰা হৈছে, যিয়ে ক্ষয়-ক্ষতিৰ মূল্যায়ন কৰিব।
ধৰালী, সেনজি আৰু বাংকুৰা গাঁৱৰ দুৰ্যোগৰ বাবে বহু ঘৰ সম্পূৰ্ণৰূপে ক্ষতিগ্ৰস্ত হৈছে। শনিবাৰে উত্তৰকাশীৰ পৰা উভতি অহাৰ পাছতেই ক্ষতিগ্ৰস্তসকলক ৫ লাখ টকাৰ তাৎক্ষণিক সাহায্য ঘোষণা কৰে উত্তৰাখণ্ডৰ মুখ্যমন্ত্ৰী পুষ্কৰ সিং ধামীয়ে। মৃতকৰ পৰিয়ালক ৫ লাখ টকাৰ আৰ্থিক সাহায্যও প্ৰদান কৰা হ’ব। এই পদক্ষেপে ক্ষতিগ্ৰস্ত পৰিয়ালসমূহক আৰ্থিক সহায় আগবঢ়াব। সাহায্যৰ কাম ক্ষিপ্ৰ কৰিবলৈ ইউ পি চি এলে যুদ্ধৰ ভিত্তিত কাম কৰি শনিবাৰে দুৰ্যোগৰ পিছত প্ৰথমবাৰৰ বাবে কাম কৰা ধাৰাউলীত বিদ্যুৎ পুনৰুদ্ধাৰ কৰে। ইয়াৰ ফলত প্ৰশাসনে সাহায্য আৰু উদ্ধাৰ অভিযান অব্যাহত ৰখাত সহজ হৈ পৰে।
একে সময়তে উত্তৰাখণ্ড আৰক্ষীয়ে ধৰালী দুৰ্যোগ সন্দৰ্ভত ছ’চিয়েল মিডিয়াত আপত্তিজনক পোষ্ট দিয়াৰ বাবে ডেৰাডুন কোতৱালিৰ ৪জন লোকৰ বিৰুদ্ধে গোচৰ ৰুজু কৰিছে। মুখ্যমন্ত্ৰী ধামীয়ে বিৰোধী দলক এই দুৰ্যোগক লৈ ৰাজনীতি নকৰিবলৈ পৰামৰ্শ দিয়ে। তেওঁ কয় যে এই সংকটৰ সময়ত সকলোৱে ইতিবাচক হৈ থাকিব লাগে আৰু ক্ষতিগ্ৰস্তক সহায় কৰিব লাগে। এই সময় ৰাজনীতিৰ নহয়, এই সময় হৈছে সকাহ দিয়াৰ সময়।
