পাকিস্তান আৰু নিউজিলেণ্ডৰ মাজত চলি থকা তিনিখন মেচৰ এদিনীয়া শৃংখলাৰ প্ৰথমখন মেচ আজি নেপিয়াৰত অনুষ্ঠিত হয়। এই মেচখনতেই নিউজিলেণ্ডৰ হৈ অভিষেক ঘটা মহম্মদ আৰ্ছলান আব্বাছে ৰচিলে এক বিশেষ অভিলেখ।
অভিষেক এদিনীয়া মেচত সৰ্বাধিক দ্ৰুততম অৰ্ধশতক অৰ্জন কৰা বিশ্বৰ প্ৰথমজন বেটছমেন হিচাপে পৰিগণিত হৈছে আব্বাছ। ২১ বছৰীয়া বেটছমেনগৰাকীয়ে মাত্ৰ ২৪টা বলত অৰ্ধশতক অৰ্জন কৰি এই বিশেষ কৃতিত্ব অৰ্জন কৰিছে।
আব্বাছৰ পূৰ্বে এই অভিলেখ আছিল সম্প্ৰতি ভাৰতীয় দলৰ পৰা বাহিৰ হৈ থকা অলৰাউণ্ডাৰ ক্ৰুনাল পাণ্ডিয়াৰ নামত। পাণ্ডিয়াই অভিষেক এদিনীয়াত ২৬টা বলত অৰ্ধশতক অৰ্জন কৰিছিল।
উল্লেখ্য যে, আজি নেপিয়াৰত আব্বাছে খেলা এই দৰ্শনীয় ইনিংছৰ পিছত সকলোৱে এই খেলুৱৈগৰাকীৰ বিষয়ে জানিব বিচাৰে। জানো আহক তেওঁৰ বিষয়ে..
২০০৩ চনৰ ২৯ নৱেম্বৰত পাকিস্তানৰ পঞ্জাৱ চহৰৰ লাহোৰত জন্ম হৈছিল আব্বাছৰ। তেওঁৰ পিতৃৰ নাম আজহাৰ আব্বাছ। আজহাৰ আছিল পাকিস্তানৰ মধ্যম গতিৰ বলাৰ। কিন্তু যেতিয়া তেওঁ পাকিস্তানত কোনো সফলতা লাভ নকৰিলে, তেতিয়া তেওঁ নিউজিলেণ্ডলৈ আহে। ইয়াত তেওঁ ৱেলিংটনৰ কাঅ’ৰী ক্লাবৰ সৈতে অংশগ্ৰহণ কৰিছিল। কিন্তু নিউজিলেণ্ড দলৰ হৈ অভিষেক ঘটোৱাত ব্যৰ্থ হয়।
আজহাৰ আব্বাছে নিউজিলেণ্ডৰ হৈ খেলাৰ সুযোগ লাভ নকৰিলেও তেওঁৰ পুত্ৰই আন্তঃৰাষ্ট্ৰীয় ক্ৰিকেটত ভৰি দিয়েই বিশেষ সফলতা লাভ কৰিলে। মহম্মদ আৰ্ছলান আব্বাছৰ বৰ্তমান বয়স ২১ বছৰ। সোঁহতীয়া বেটছমেন আব্বাছে মধ্যম গতিত বলিঙো কৰে।
ইফালে আজিৰ অভিষেক মেচত মহম্মদ আৰ্ছলান আব্বাছে ষষ্ঠ স্থানত বেটিং কৰিবলৈ আহি ২৬টা বলত ২০০ ষ্ট্ৰাইক ৰেটেৰে ৫২ ৰানৰ ইনিংছ খেলিবলৈ সক্ষম হয়। তেওঁৰ ইনিংছত আছিল তিনিটা চাৰি আৰু তিনিটা ছয়।
উল্লেখ্য যে, এদিনীয়া শৃংখলাৰ প্ৰথমখন মেচত প্ৰথমে বেট ধৰি নিউজিলেণ্ড দলে ৩৪৫ ৰানৰ লক্ষ্য বান্ধি দিয়ে পাকিস্তানক। কিন্তু ৪৪.১ অভাৰতে ২৭১ ৰান সংগ্ৰহ কৰি নিজৰ ইনিংছ সামৰে পাকিস্তানে। ৭৩ ৰানত বিজয়ী হৈ এইদৰে নিউজিলেণ্ড দলে শৃংখলাটোত ১-০ৰ অগ্ৰগতি লাভ কৰে।
