ধুবুৰী জিলাৰ তামাৰহাটৰ পৰা আহিছে এটা অত্যন্ত মৰ্মান্তিক খবৰ। শনিবাৰে অঞ্চলটোৰ শগুণচৰা গাঁৱৰ এটা পৰিয়ালৰ তিনিগৰাকী সদস্যই নিজা বাসগৃহৰ ভিতৰত জীৱনৰ চৰম পন্থা গ্ৰহণ কৰাক লৈ তীব্ৰ চাঞ্চল্য সৃষ্টি হৈছে।
জীৱনৰ এই চৰম পন্থা লোৱা তিনিগৰাকীৰ ভিতৰত আছে মাতৃ আৰু দুই কন্যা। আত্মহত্যা কৰা তিনিগৰাকীক ক্ৰমে মাতৃ শুকলতা ৰায়, কন্যা দিতিমণি ৰায় (১০) আৰু কনিকা ৰায় (৪) বুলি চিনাক্ত কৰা হৈছে।
ইফালে হঠাতে পত্নী আৰু দুই কন্যাক হেৰুৱাই শোকত ভাগি পৰিছে স্বামী তথা পিতৃ দীপক ৰায়। পত্নী আৰু দুই কন্যাই কি কাৰণত এই চৰম পন্থা গ্ৰহণ কৰিলে সেই কথা এই পৰ্যন্ত জানিব পৰা হোৱা নাই।
ইফালে এই মৰ্মান্তিক খবৰ লাভ কৰাৰ লগে লগে ঘটনাস্থলত গোলকগঞ্জৰ চক্ৰ আৰক্ষী বিষয়া ৰাতুল হালৈৰ নেতৃত্বত এটা দল উপস্থিত হৈ মৃতদেহ কেইটা উদ্ধাৰ কৰি মৰণোত্তৰ পৰীক্ষাৰ বাবে প্ৰেৰণ কৰে। আনহাতে ঘটনাৰ প্ৰাথমিক তদন্ত অব্যাহত ৰাখিছে বুলিও জনাই আৰক্ষী বিষয়াজনে।
