চলিত বৰ্ষ ২০২৪ত ভাৰতে অৰ্জন কৰিছে বহু কৃতিত্ব। আমি যদি কেৱল ক্ৰীড়া জগতৰ কথা কওঁ, তেন্তে বিশ্ব ক্ৰীড়া ক্ষেত্ৰত বহু মহিলা খেলুৱৈয়ে গৌৰৱ কঢ়িয়াই আনিছে দেশলৈ। চলিত বৰ্ষক বিদায় জনোৱাৰ প্ৰাকমুহূৰ্তত জানো আহক বিশ্বৰ ক্ৰীড়া ক্ষেত্ৰৰ লগতে আন আন ক্ষেত্ৰত বিশেষ কৃতিত্ব গঢ়া দেশৰ পাঁচগৰাকী কন্যাৰ বিষয়ে।
মনু ভাকৰ
২০২৪ চনৰ পেৰিছ অলিম্পিক গেমছত ভাৰতে অতি সুন্দৰ প্ৰদৰ্শন আগবঢ়াইছিল আৰু দেশখনে বহু পদক লাভ কৰিছিল। একে সময়তে দেশৰ স্বাধীনতাৰ পাছত মনু ভাকেৰে একেটা সংস্কৰণতে দুটা পদক লাভ কৰা প্ৰথমগৰাকী খেলুৱৈ হিচাপে পৰিগণিত হয়।
২২ বছৰীয়া মনুৱে ১০ মিটাৰ এয়াৰ পিষ্টলত ব্ৰঞ্জৰ পদক লাভ কৰে। ইয়াৰ উপৰি তেওঁৰ সংগী সৰবজোৎ সিঙৰ সৈতে ২৫ মিটাৰ এয়াৰ পিষ্টল ইভেণ্টটো ব্ৰঞ্জৰ পদক লাভ কৰে।
অৱনী লেখাৰা
ভাৰতীয় ৰাইফল শ্বুটাৰ অৱনী লেখাৰাই ২০২৪ চনৰ পেৰালিম্পিক গেমছত স্বৰ্ণ পদক লাভ কৰি ইতিহাস ৰচিছিল। ২০২৪ চনৰ পেৰিছ পেৰালিম্পিক গেমছত ১০ মিটাৰ এয়াৰ পিষ্টলত দুটা পদক লাভ কৰিছিল অৱনী লেখাৰাই। ইয়াত অৱনীয়ে ব্ৰঞ্জৰ পদকো লাভ কৰে। একেখন ইভেণ্টতে দুটাকৈ পদক লাভ কৰা প্ৰথমগৰাকী পেৰালিম্পিক মহিলা খেলুৱৈ হিচাপেও পৰিগণিত হয় অৱনী।
সন্মানীয় প্ৰতিযোগিতাখনত দুটাকৈ পদক জয় কৰি অৱনীয়ে কৈছিল, ‘দেশৰ বাবে স্বৰ্ণ পদক লাভ কৰি মই অতি সুখী’।
নেন্সি ত্যাগী
উত্তৰ প্ৰদেশ বাগপট-বৰাউতৰ বাসিন্দা ফেশ্বন ইনফ্লৱেন্সাৰ নেন্সি ত্যাগীৰ বিষয়ে আজি সকলো জ্ঞাত। নেন্সীয়ে ২০২৪ চনৰ কান চলচ্চিত্ৰ মহোৎসৱত অভিষেক ঘটাই সমগ্ৰ বিশ্বত আলোড়নৰ সৃষ্টি কৰিছিল। ৭৭ সংখ্যক কান চলচ্চিত্ৰ মহোৎসৱৰ ৰেড কাৰ্পেটত নেন্সীয়ে নিজৰ হাতেৰে নিৰ্মিত প্ৰতিটো পোছাকৰে দৃষ্টি কাঢ়িছিল বিশ্ববাসীৰ। সোণম কাপুৰকে ধৰি বহু অভিনেত্ৰীয়ে নেন্সীৰ সাজ-পোছাকক ভূয়সী প্ৰশংসা কৰিছিল। দিল্লীৰ গান্ধী নগৰ (সীলমপুৰ) বজাৰৰ পৰা কাপোৰ ক্ৰয় কৰি নেন্সি ত্যাগীয়ে ট্ৰেণ্ডি ড্ৰেছ তৈয়াৰ কৰে।
মোহনা সিং
বায়ুসেনাৰ তেজছ যুদ্ধ বিমান উৰুওৱা প্ৰথমগৰাকী মহিলা পাইলট হৈ ইতিহাস ৰচিছে স্কোয়াড্ৰন লীডাৰ মোহনা সিঙে। গুজৰাটৰ নলিয়াত থকা ১৮ নং ফ্লাইং বুলেট স্কোয়াড্ৰনৰ দায়িত্ব তেওঁক অৰ্পণ কৰা হৈছে। যোধপুৰৰ ‘তৰং শক্তি’ অনুশীলনৰ অংশও আছিল মোহনা সিং, য’ত তিনিটা সেনাৰ তিনিজন উপ-মুখ্যৰ সৈতে ঐতিহাসিক উৰণৰ অভিজ্ঞতা লাভ কৰিছিল। ভাৰতীয় বায়ুসেনাত যুদ্ধ বিমান পাইলট হোৱা তিনিগৰাকী মহিলাৰ প্ৰথম গ্ৰুপত মোহনা সিংও আছিল।
সাধনা ছাক্সেনা
অৱশেষত ২০২৪ চনৰ চলিত বৰ্ষত লেফটেনেণ্ট জেনেৰেল সাধনা ছাক্সেনা নাইৰে চিকিৎসা সেৱাৰ সঞ্চালক প্ৰধান হিচাপে নিযুক্তি পোৱা প্ৰথমগৰাকী মহিলা হিচাপে পৰিগণিত হয়। তেওঁ লগতে সাধাৰণ চিকিৎসালয় সেৱা (সশস্ত্ৰ বাহিনী)ৰ সঞ্চালিকা হিচাপে কাৰ্যনিৰ্বাহ কৰা প্ৰথমগৰাকী মহিলা আৰু লগতে পশ্চিম বায়ু কমাণ্ডৰ প্ৰধান চিকিৎসা বিষয়া হিচাপে কাৰ্যনিৰ্বাহ কৰা প্ৰথমগৰাকী মহিলা।
উল্লেখ্য যে, পৰিয়াল চিকিৎসা বিষয়ত স্নাতকোত্তৰ ডিগ্ৰী আৰু মাতৃ আৰু শিশু স্বাস্থ্যৰ ডিপ্লমাকে ধৰি বহু অৰ্হতা আছে লেফটেনেণ্ট জেনেৰেল নাইৰৰ। কেৱল এয়াই নহয়, সাধনাই ইজৰাইলৰ প্ৰতিৰক্ষা বাহিনীৰ সৈতে ৰাসায়নিক, জৈৱিক, ৰেডিঅ’লজিকেল, পাৰমাণৱিক (চিবিআৰএন) যুদ্ধৰ প্ৰশিক্ষণ আৰু ছুইজাৰলেণ্ডৰ স্পিজত চুইজাৰলেণ্ডৰ সশস্ত্ৰ বাহিনীৰ সৈতে সামৰিক চিকিৎসা নৈতিকতাৰ প্ৰশিক্ষণো লৈছে।
তেওঁৰ উল্লেখনীয় অৱদানৰ বাবে ভাৰতৰ সন্মানীয় ৰাষ্ট্ৰপতিয়ে তেওঁক পশ্চিম এয়াৰ কমাণ্ডৰ এয়াৰ অফিচাৰ কমাণ্ডিং ইন চিফ (AOC-in-C)ৰ লগতে বিশিষ্ট সেৱা পদক প্ৰদান কৰে।
