বাংলাদেশৰ অন্তৱৰ্তীকালীন চৰকাৰৰ মুখ্য উপদেষ্টা মহম্মদ ইউনুছ গৈছিল চীন ভ্ৰমণৰ বাবে। এই ভ্ৰমণৰ সমছোৱাত চীনৰ ৰাষ্ট্ৰপতি ঝি জিনপিঙৰ সৈতে গুৰুত্বপূৰ্ণ বৈঠকত অংশ লৈছিল। বৈঠকৰ অন্তত চীন আৰু বাংলাদেশৰ মাজত বহু গুৰুত্বপূৰ্ণ বিষয়ত স্বাক্ষৰো কৰা হয়।
এই বৈঠকৰ মাজতে ভাৰতৰ উত্তৰ-পূবক লৈ গুৰুত্বপূৰ্ণ মন্তব্য কৰে বাংলাদেশৰ মুখ্য উপদেষ্টা মহম্মদ ইউনুছে। ভাৰতৰ উত্তৰ-পূৰ্বাঞ্চল মাটিৰ দ্বাৰা বেৰি থকা এক অঞ্চল আৰু যিয়ে চীনক এক সুন্দৰ সুবিধা প্ৰদান কৰে বুলি মন্তব্য কৰে।
চাৰিদিনীয়া চীন যাত্ৰাৰ মহম্মদ ইউনুছে উত্তৰ-পূৰ্বাঞ্চলক লৈ কৰা এই মন্তব্যৰ ভিডিঅ’ ছ’চিয়েল মিডিয়াত ভাইৰেল হৈ পৰিছে।
চীনৰ সৈতে হোৱা দ্বিপাক্ষিক বৈঠকত ইউনুছে সমুদ্ৰ ক্ষেত্ৰত বাংলাদেশ মহাসাগৰৰ একমাত্ৰ সংৰক্ষক বুলি কৈ এয়া চীনৰ বাবে এক ডাঙৰ সুবিধা যাৰ জৰিয়তে চীনে নিজৰ ব্যৱসায় আৰু অধিক সম্প্ৰসাৰণ কৰিব পাৰে বুলি মন্তব্য কৰে।
মহম্মদ ইউনুছৰ উত্তৰ-পূৰ্বাঞ্চলক লৈ কৰা মন্তব্যৰ পিছতে ভাৰতৰ ৰাজনীতিত বিষয়টোৱে খলকনিৰ সৃষ্টি কৰিছে। প্ৰধানমন্ত্ৰী মোদীৰ অৰ্থনৈতিক উপদেষ্টা পৰিষদৰ সদস্য সঞ্জীল সন্যালে সামাজিক মাধ্যমৰ জৰিয়তে মহম্মদ ইউনুছক প্ৰশ্ন উত্থাপন কৰিছে।
তেওঁ কয়, ‘বাংলাদেশলৈ চীনে অৰ্থনৈতিক সকাহ প্ৰদান কৰাত আমাৰ কোনো আপত্তি নাই, কিন্তু বাংলাদেশে ভাৰতৰ সাত ৰাজ্যৰ কথা কিয় উল্লেখ কৰিছে সেয়াহে ডাঙৰ প্ৰশ্ন’।
বাংলাদেশৰ অন্তৱৰ্তীকালীন চৰকাৰৰ মুখ্য উপদেষ্টা মহম্মদ ইউনুছৰ এই মন্তব্যক বিভিন্ন ৰাজ নেতাৰ লগতে অসমৰ মুখ্যমন্ত্ৰী ড০ হিমন্ত বিশ্ব শৰ্মাইও কঠোৰ ভাষাৰে সমালোচনা কৰে।
