মৰমৰ শিল্পী জুবিন গাৰ্গৰ ৰহস্যজনক মৃত্যুৰ উচিত তদন্ত বিচাৰিছে সমগ্ৰ অসমৱাসীয়ে। জুবিন গাৰ্গক ন্যায় দিবলৈ চৰকাৰক আহ্বান জনাইছে প্ৰতিজন অসমীয়াই।
ইফালে জুবিন গাৰ্গক ন্যায় দিয়াত অধিক আত্মবিশ্বাসী হৈছে মুখ্যমন্ত্ৰী ড০ হিমন্ত বিশ্ব শৰ্মা। জুবিন গাৰ্গৰ ৰহস্যজনক মৃত্যুৰ তদন্তক লৈ তাৎপৰ্যপূৰ্ণ মন্তব্য মুখ্যমন্ত্ৰীগৰাকীয়ে। ভিছেৰা ৰিপ’ৰ্ট দাখিলৰ পাছতে CIDয়ে সমগ্ৰ ঘটনাৰ এটা নিৰ্দিষ্ট দিশ বিচাৰি পাইছে বুলি জনালে মুখ্যমন্ত্ৰীয়ে। শীঘ্ৰেই সমস্ত ঘটনাৰ প্ৰতিবেদন আদালতত দাখিল কৰিব পাৰিব SITয়ে।
ফেচবুক লাইভত মন্তব্য প্ৰকাশ কৰি ভিছেৰা ৰিপ’ৰ্ট সন্দৰ্ভত মুখ্যমন্ত্ৰীয়ে কয়, ‘দিল্লীৰ চেণ্ট্ৰেল ফৰেনছিক লেবৰেটৰীয়ে আমাক ভিছেৰা ৰিপ’ৰ্ট।ভিছেৰা ৰিপ’ৰ্টত CIDয়ে বিচাৰি পাইছে জুবিন গাৰ্গৰ মৃত্যুৰ তদন্তৰ নিৰ্দিষ্ট দিশ।নিৰ্ধাৰিত সময়ৰ ভিতৰত আদালতত দাখিল কৰা হ’ব তদন্তৰ প্ৰতিবেদন।ভিছেৰা ৰিপ’ৰ্টে অধিক ত্বৰান্বিত কৰিছে ন্যায় প্ৰক্ৰিয়াক।’
লগতে মুখ্যমন্ত্ৰী ড০ শৰ্মাই কয় যে, ছিংগাপুৰত জুবিন গাৰ্গৰ অন্তিম মুহূৰ্তৰ সাক্ষী হোৱা আৰু ৭ জন অসমীয়া প্ৰৱাসী ইতিমধ্যে সোমবাৰে গুৱাহাটীত উপস্থিত হৈছে CIDৰ আগত নিজৰ বক্তব্য লিপিবদ্ধ কৰিব।
অন্য ৬ গৰাকীকো শীঘ্ৰে অসমলৈ আহিবলৈ আহ্ৱান জনাই মুখ্যমন্ত্ৰীয়ে। মুখ্যমন্ত্ৰীয়ে কয় যে ‘আপোনালোক অসমলৈ আহিবই লাগিব। অসমলৈ নিজে নাহিলে কেনেকৈ আনিব লাগে তাৰ বাবে আইনৰ ব্যৱস্থা ল’বলৈ আমি কুণ্ঠাবোধ নকৰো।’
