চিৰ নিদ্ৰাত অসমৰ অতি মৰমৰ শিল্পী জুবিন গাৰ্গ। ছিংগাপুৰত মৃত্যুক সাৱটি লোৱা জুবিন গাৰ্গৰ নশ্বৰ দেহ সম্প্ৰতি আছে সৰুসজাইত। এই সৰুসজাই ষ্টেডিয়ামতে আজি আৰু কাইলৈৰ দিনটোত তেওঁক অনুৰাগীসকলে শেষবাৰৰ বাবে শ্ৰদ্ধাঞ্জলি জনাব।
মৰমৰ শিল্পীগৰাকীক শ্ৰদ্ধাঞ্জলি জনাই থকাৰ সময়তে জুবিন গাৰ্গৰ অন্ত্যেষ্টিক্ৰিয়া সন্দৰ্ভত আহিছে এটা ডাঙৰ খবৰ। মুখ্যমন্ত্ৰী হিমন্ত বিশ্ব শৰ্মাৰ অধ্যক্ষতাত অনুষ্ঠিত হোৱা কেবিনেট বৈঠকত জুবিন গাৰ্গৰ অন্ত্যেষ্টিক্ৰিয়া সন্দৰ্ভত চূড়ান্ত সিদ্ধান্ত গ্ৰহণ কৰা হৈছে।
সংবাদমেলযোগে মুখ্যমন্ত্ৰী হিমন্ত বিশ্ব শৰ্মাই কৰা ঘোষণা অনুসৰি গুৱাহাটী মহানগৰীৰ সমীপৰ সোণাপুৰৰ কমাৰকুছিৰ হাটীমূৰাত ৰাষ্ট্ৰীয় ঘাইপথৰ সমীপত হ’ব জুবিন গাৰ্গৰ অন্ত্যেষ্টিক্ৰিয়া। অন্ত্যেষ্টিক্ৰিয়া সম্পন্ন হ’বলগীয়া স্থানটো হৈছে দিচাং ৰিজৰ্টৰ সমীপত।
মুখ্যমন্ত্ৰী শৰ্মাই লগতে জানিব দিয়ে যে অন্ত্যেষ্টিক্ৰিয়া সম্পন্ন হ’বলগীয়া ঠাইতে নিৰ্মাণ কৰা হ’ব সমাধি ক্ষেত্ৰ। ইফালে যোৰহাটতো জুবিন গাৰ্গৰ ভস্ম লৈ যোৱা হ’ব আৰু তাতো নিৰ্মাণ কৰা হ’ব সমাধি ক্ষেত্ৰ।
মুখ্যমন্ত্ৰী শৰ্মাই ঘোষণা কৰা অনুসৰি, জুবিন গাৰ্গৰ নশ্বৰ দেহ ২৩ ছেপ্তেম্বৰৰ পুৱা ৮ বজাত সৰুসজাইৰ পৰা সোণাপুৰৰ অন্ত্যেষ্টিক্ৰিয়া স্থানলৈ লৈ যোৱা হ’ব আৰু সেইদিনাই সম্পন্ন হ’ব শেষকৃত্য।
