আন এক কৃতিত্বৰ অধিকাৰী হ’ল ভাৰতীয় ক্ৰিকেট দলৰ তাৰকা বেগী বলাৰ মহম্মদ ছামী। চেম্পিয়নছ ট্ৰফীৰ দ্বিতীয়খন মেচ তথা ভাৰতৰ প্ৰথমখন মেচতেই বিশেষ অভিলেখ গঢ়িলে মহম্মদ ছামীয়ে। বাংলাদেশৰ বিৰুদ্ধে ডুবাইত অনুষ্ঠিত হোৱা মেচখনত ছামীয়ে এদিনীয়া ক্ৰিকেটত সৰ্বাধিক দ্ৰুত গতিত ২০০ উইকেট লাভ কৰা প্ৰথমগৰাকী ভাৰতীয় আৰু বিশ্বৰ দ্বিতীয়গৰাকী বলাৰত পৰিণত হয়।
প্ৰথম ইনিংছৰ ৪৩ অভাৰত জাকেৰ আলীৰ উইকেট দখল কৰাৰ লগে লগে তেওঁৰ নামত সংযোজন হয় এই অভিলেখ। সৰ্বাধিক কম সংখ্যক এদিনীয়া মেচত ২০০ উইকেট লাভ কৰাৰ তালিকাত তেওঁৰ আগত আছে অষ্ট্ৰেলিয়াৰ মিচেল ষ্টাৰ্ক।
ইফালে ভাৰতৰ হৈ এদিনীয়াত সৰ্বাধিক উইকেট লাভ কৰাৰ ক্ষেত্ৰত ৩৩৪টা উইকেটেৰে শীৰ্ষ স্থানত আছে অনিল কুম্বলে। ৩১৫টা উইকেটৰ সহায়ত দ্বিতীয় স্থানত আছে জভাগল শ্ৰীনাথ আৰু ২৮৮টা উইকেটেৰে তৃতীয় স্থানত আছে অজিত আগাৰকাৰ। ভাৰতৰ হৈ ২০০ উইকেট লাভ কৰা ছামী সপ্তমগৰাকী বলাৰ।
উল্লেখ্য যে, আজি বাংলাদেশৰ বিৰুদ্ধে অনুষ্ঠিত মেচখনত মহম্মদ ছামীয়ে ১০ অভাৰত ৫৩ ৰান খৰচ কৰি পাঁচটা উইকেট লাভ কৰে। ভাৰতীয় বলাৰৰ নিয়ন্ত্ৰিত বলিঙৰ বাবেই বাংলাদেশে ২২৮ ৰানতে সামৰে নিজৰ ইনিংছ।
কম সংখ্যক এদিনীয়া মেচত ২০০ উইকেট লাভ কৰা বলাৰৰ তালিকা
মিচেল ষ্টাৰ্ক- ১০২খন মেচ
মহম্মদ ছামী/চাকলেন মুস্তাক- ১০৪খন মেচ
ট্ৰেণ্ট বল্ট- ১০৭খন মেচ
ব্ৰেট লী- ১১২খন মেচ
এলান ডনাল্ড- ১১৭খন মেচ
কম সংখ্যক বলত ২০০ উইকেট লাভ কৰা বলাৰ
মহম্মদ ছামী- ৫১২৬টা বল
মিচেল ষ্টাৰ্ক- ৫২৪০টা বল
চাকলেন মুস্তাক- ৫৪৫১টা বল
ব্ৰেট লী- ৫৬৪০টা বল
ট্ৰেণ্ট বল্ট- ৫৭৮৩টা বল
