বৃহস্পতিবাৰে ডুবাই আন্তঃৰাষ্ট্ৰীয় ক্ৰিকেট ষ্টেডিয়ামত অনুষ্ঠিত চেম্পিয়নছ ট্ৰফীৰ দ্বিতীয়খন মেচত বাংলাদেশক সহজে ৬ উইকেটত পৰাস্ত কৰি ভাৰতে বিজয় অভিযান আৰম্ভ কৰে।
ইয়াৰ পূৰ্বে টছত জয়ী হৈ প্ৰথমে বেটিং কৰাৰ পিছত বাংলাদেশে তৌহিদ হৃদয় আৰু জাকেৰ আলীৰ মাজত ষষ্ঠ উইকেটৰ বাবে ১৫৬ ৰানৰ পাৰ্টনাৰশ্বিপৰ সহায়ত ২২৮ ৰান সংগ্ৰহ কৰি ভাৰতক ২২৯ ৰানৰ লক্ষ্য বান্ধি দিছিল।
বাংলাদেশে প্ৰথম দহ অভাৰত ৫টা উইকেট হেৰুৱাইছিল যদিও তৌহিদ হৃদয় আৰু জাকেৰ আলীয়ে দলটোক কিছু সন্তোষজনক স্থিতিলৈ লৈ অনাত সহায় কৰে। তৌহিদ হৃদয়ে ১১৮টা বলত ১০০ ৰান সংগ্ৰহ কৰে। আনহাতে জাকিৰ আলীয়ে ১১৪টা বলত ৬৮ ৰান সংগ্ৰহ কৰে।
ইফালে ভাৰতৰ হৈ মহম্মদ ছামীয়ে ৫টা উইকেট দখল কৰে। এই মেচখনত মহম্মদ ছামীয়ে নিজৰ এদিনীয়া কেৰিয়াৰত ২০০ উইকেট সম্পূৰ্ণ কৰে। মহম্মদ ছামী আন্তঃৰাষ্ট্ৰীয় এদিনীয়া ক্ৰিকেটত সৰ্বনিম্ন বলত ২০০ উইকেট দখল কৰা বলাৰত পৰিণত হৈছে।
ইয়াৰ উপৰি ছামী আই চি চি বিশ্বকাপ আৰু চেম্পিয়নছ ট্ৰফীত সৰ্বাধিক উইকেট দখল কৰা ভাৰতীয় বলাৰ হিচাপেও পৰিগণিত হয়।
