সততে নোহোৱা নোপোজা এক ঘটনা সংঘটিত হৈছে নগাঁও জিলাৰ ৰূপহীহাটত। কংগ্ৰেছ দলে আয়োজন কৰা এখন সভাত ৰাইজক অংশ নলবলৈ আৰক্ষীয়ে মাইকযোগে আহ্বান জনোৱা পৰিলক্ষিত হৈছে।
আৰক্ষীয়ে মাইকযোগে কৰা ঘোষণা অনুসৰি, ৰূপহীহাটৰ হাতীপুখুৰীত আজি আয়োজন কৰা কংগ্ৰেছ দলৰ এই সভাখন অনুষ্ঠিত কৰিবলৈ জিলা প্ৰশাসনে অনুমতি প্ৰদান কৰা নাই। সেয়ে এই সভাত সাধাৰণ জনতাক অংশ নল’বলৈ মাইকযোগে ঘোষণা কৰিছে আৰক্ষীয়ে।
ৰূপহীহাটৰ বিভিন্ন অঞ্চলত গৈ আৰক্ষীয়ে এই ঘোষণা কৰাৰ লগতে যদিহে কোনো লোকে অনুমতি বহিৰ্ভূত এই সভাত অংশ লয় তেন্তে আইনভাৱে কঠোৰ ব্যৱস্থা গ্ৰহণ কৰিব বুলিও উল্লেখ কৰে।
জানিব পৰা মতে, আজি ৰূপহীহাটৰ হাতীপুখুৰী মণ্ডল কংগ্ৰেছ কমিটিয়ে আয়োজন কৰিছিল এখন কৰ্মী সভা। আৰক্ষী-প্ৰশাসনৰ মতে কংগ্ৰেছে এই সভা আয়োজনৰ বাবে আগতীয়াকৈ কোনোধৰণৰ অনুমতি লোৱা নাছিল।
ইফালে, কোনো কাৰণতেই যাতে কংগ্ৰেছ দলে এই সভা অনুষ্ঠিত কৰিব নোৱাৰে তাৰ বাবে আৰক্ষী আৰু অৰ্ধ সামৰিক বাহিনীৰ বৃহত দলে সেই অঞ্চলটোত টহল দি আছে।
আৰক্ষীৰ এই কঠোৰ নিৰ্দেশনাৰ পিছতেই এতিয়া ৰূপহীহাটৰ কংগ্ৰেছ কৰ্মী আৰু সাধাৰণ জনতাৰ মাজত তীব্ৰ প্ৰতিক্ৰিয়াৰ সৃষ্টি হোৱাৰ লগতে জিলা প্ৰশাসনৰ এই সিদ্ধান্তক গণতন্ত্ৰৰ প্ৰতি চূড়ান্ত ভাবুকি বুলিও একাংশই মত পোষণ কৰে।
উল্লেখ্য যে, যোৱা ২০ ফেব্ৰুৱাৰীত কংগ্ৰেছ দলে অনুষ্ঠিত কৰা এখন সভাত অংশ ল’বলৈ যোৱা অৱস্থাত দুৰ্বত্তৰ আক্ৰমণৰ বলি হৈছিল ধুবুৰীৰ সাংসদ ৰকিবুল হুছেইন। সাংসদগৰাকীক আক্ৰমণ কৰাৰ পিছৰে পৰা ৰাজ্যজুৰি প্ৰতিবাদ সাব্যস্ত কৰিছে কংগ্ৰেছ দলে।
ৰূপহীহাটৰ যিকোনো প্ৰান্ততে এনেধৰণৰ ঘটনা যাতে পুনৰাবৃত্তি নহয় তাৰ প্ৰতি লক্ষ্য ৰাখি আৰক্ষীয়ে কটকটীয়া নিৰাপত্তা গঢ়ি তুলিছে।
