হজৰ পৰা উভতি অহা এটা পৰিয়ালৰ সৈতে সংঘটিত হ’ল এক ভয়ংকৰ দুৰ্ঘটনা। এখন তীব্ৰবেগী বাছৰ খুন্দাত প্ৰাণ হেৰুৱালে এটা পৰিয়ালৰ তিনি পুত্ৰ আৰু পিতৃসহ মুঠ পাঁচজন লোকে।
বৃহস্পতিবাৰে দিল্লী-লক্ষ্ণৌ ঘাইপথত সংঘটিত হৈছে এই ভয়ংকৰ পথ দুৰ্ঘটনা। নিহত কেইজনৰ ভিতৰত আছে আশ্ৰফ (৬৫), তেওঁৰ তিনি পুত্ৰ নকছে আলী (৪২), আৰিফ আলী (২৪), ইণ্টেখাব আলী (২০) আৰু গাড়ী চালক আহছান (৩২)।
এই দুৰ্ঘটনাত আহত হয় পত্নী জাইতুন আৰু তেওঁৰ পুত্ৰ আছিফ আলী। এই আটাইকেইজন স্বৰ কোটৱালিৰ মুকাৰমপুৰ গাঁৱৰ বাসিন্দা।
জানিব পৰা অনুসৰি, ৰামপুৰ জিলাৰ স্বৰ কোটৱালি অঞ্চলৰ মুকাৰমপুৰ গাঁৱৰ বাসিন্দা আশ্ৰফ আলী আৰু তেওঁৰ পত্নী জাইতুনে হজ কৰিবলৈ ছৌদি আৰৱলৈ গৈছিল। হজ কৰি বুধবাৰে সন্ধিয়া দিল্লী বিমানবন্দৰত অৱতৰণ কৰিছিল স্বামী-স্ত্ৰী।
দিল্লীৰ পৰা তেওঁলোকক ঘৰলৈ অনাৰ বাবে বুধবাৰে বিমানবন্দৰত উপস্থিত হৈছিল তেওঁলোকৰ পুত্ৰ নকছে আলী, আৰিফ আলী, আছিফ আলী আৰু ইণ্টেখাব আলী। গাড়ীখনৰ চালক আছিল তেওঁলোকৰ গাঁৱৰে আহছান নামৰ এজন লোক। পৰিয়ালটোৰ আটাই কেইগৰাকী সদস্যই নিশাই উভতিছিল নিজ গাঁও মুকাৰমপুৰলৈ।
জানিব পৰা মতে, বৃহস্পতিবাৰে পুৱা প্ৰায় ৬ বজাত তেওঁলোকৰ গাড়ীখন মুণ্ডাপাণ্ডে পোৱাৰ লগে লগে সন্মুখৰ পৰা অহা বাছখনে গাড়ীখনক খুন্দা মাৰে। দুৰ্ঘটনাটো ইমানেই ভয়াৱহ আছিল যে চাৰিচকীয়া বাহনখন প্ৰায় চূৰ্ণ বিচূৰ্ণ হৈ পৰে।
দুৰ্ঘটনাটোত আশ্ৰফ, তেওঁৰ পুত্ৰ নকছে আলী, আৰিফ আৰু চালক আহছানৰ থিতাতে মৃত্যু হয়। তৃতীয় পুত্ৰ ইণ্টেখাবৰ চিকিৎসালয়ত মৃত্যু হয়। দুৰ্ঘটনা সংঘটিত হোৱাৰ পিছত সেই স্থানত এক অৱৰ্ণণীয় পৰিৱেশৰ সৃষ্টি হয়।
দুৰ্ঘটনাত আহত আশ্ৰফৰ পত্নী আৰু পুত্ৰ আছিফ মোৰাদাবাদ চিকিৎসালয়ত চিকিৎসাধীন হৈ আছে। দুৰ্ঘটনাটোৰ খবৰ পোৱাৰ পিছতে মুকৰামপুৰ গাঁৱত শোকাকূল পৰিৱেশে বিৰাজ কৰিছে।
