আই পি এল ২০২৫ৰ বাবে দিল্লী কেপিটেলছ দলে মেণ্টৰ হিচাপে নিযুক্তি দিছে ইংলেণ্ডৰ প্ৰাক্তন অধিনায়ক কেভিন পিটাৰছনক। পিটাৰছনে দিল্লী কেপিটেলছৰ উপৰি আন কেইবাটাও দলৰ হৈ আই পি এলত খেলিছিল।
পিটাৰছনে মুখ্য প্ৰশিক্ষক হেমাংগ বাদানী, মেথিউ মট (সহায়ক প্ৰশিক্ষক), মুনাফ পেটেল (বলিং প্ৰশিক্ষক) আৰু বেনুগোপাল ৰাওৰ সৈতে দলটোক শক্তিশালী কৰাত ভূমিকা গ্ৰহণ কৰিব।
আই পি এলত কেভিন পিটাৰছনৰ এইটোৱেই হ’ব প্ৰথম প্ৰশিক্ষকৰ অভিজ্ঞতা। তেওঁ শেষবাৰৰ বাবে ২০১৬ চনত লীগ ক্ৰিকেট খেলিছিল। ২০০৯ চনৰ পৰা ২০১৬ চনলৈকে তেওঁ ৩টা দলৰ হৈ আই পি এল খেলিছিল। ইয়াৰ ভিতৰত দিল্লী কেপিটেলছ (তেতিয়াৰ দিল্লী ডেয়াৰডেভিলছ)ও অন্তৰ্ভুক্ত।
ইয়াৰ উপৰি তেওঁ আই পি এলৰ ১৭খন মেচতো অধিনায়কত্ব কৰিছিল। ২০০৯ চনত পিটাৰছেনে ৰয়েল চেলেঞ্জাৰ্ছ বাংগালুৰুৰ অধিনায়কত্ব কৰে। ইয়াৰ পিছত ২০১৪ চনত তেওঁ গোটেই ছিজনটো ডেয়াৰডেভিলছৰ অধিনায়ক হিচাপে কাম কৰে। অৱশ্যে দলটোৰ প্ৰদৰ্শন বেয়া আছিল। সেই ছিজনত দিল্লীয়ে ১৪খন মেচত দুটা জয়ৰে পইণ্ট তালিকাৰ তলত আছিল।
উল্লেখ্য যে, কেভিন পিটাৰছনে ইংলেণ্ডৰ হৈ ১০৪খন টেষ্ট, ১৩৬খন এদিনীয়া আৰু ৩৭খন আন্তঃৰাষ্ট্ৰীয় মেচ খেলিছিল। টেষ্টত ৮১৮১, এদিনীয়াত ৪৪৪০ আৰু টি-২০ত ১১৭৬ ৰান সংগ্ৰহ কৰিছিল।
কোন হ’ব দিল্লীৰ অধিনায়ক
আই পি এলৰ নিলামত দিল্লী কেপিটেলছে ১৪ কোটি টকাত ক্ৰয় কৰিছে কে এল ৰাহুলক। ৰাহুলে পূৰ্বতে পঞ্জাৱ আৰু লক্ষ্ণৌ দলক নেতৃত্ব প্ৰদান কৰিছিল। সেয়ে আগন্তুক ছিজনৰ বাবে দিল্লী কেপিটেলছে কে এল ৰাহুলকে নেতৃত্বৰ দায়িত্ব অৰ্পণ কৰিব বুলি অনুমান কৰা হৈছে।
