ডুবাইত ত্ৰিৰংগা উত্তোলন কৰি উভতি আহিছে ভাৰতীয় ক্ৰিকেট দলটো। নিউজিলেণ্ডক পৰাস্ত কৰি চেম্পিয়নছ ট্ৰফী ২০২৫ খিতাপ দখল কৰিছে ৰোহিত বাহিনীয়ে।
এতিয়া অহা ২ মাহৰ বাবে টীম ইণ্ডিয়াই কোনো আন্তঃৰাষ্ট্ৰীয় মেচত অংশগ্ৰহণ কৰিব নোৱাৰিব, কাৰণ ২২ মাৰ্চৰ পৰা ২৫ মে’লৈ সমগ্ৰ ভাৰতে আই পি এল ২০২৫ৰ উপভোগ কৰিবলৈ উৎসুক হৈ আছে।
ইফালে খবৰ ওলাইছে যে, টীম ইণ্ডিয়াৰ মুখ্য প্ৰশিক্ষক গৌতম গম্ভীৰে ‘ইণ্ডিয়া A’ দলৰ সৈতে ইংলেণ্ডলৈ যাব। উল্লেখ্য যে, জুন-জুলাই মাহত ভাৰতে ইংলেণ্ডৰ সৈতে ৫খন মেচৰ টেষ্ট ছিৰিজ (IND vs ENG Test 2025)ত অংশগ্ৰহণ কৰিব।
খবৰ অনুসৰি, ২০ জুনত ইণ্ডিয়া-ইংলেণ্ড টেষ্ট শৃংখলা আৰম্ভ হোৱাৰ পূৰ্বে গৌতম গম্ভিৰে ‘ইণ্ডিয়া A’ দলৰ সৈতে ইংলেণ্ড ভ্ৰমণ কৰিব। মন কৰিবলগীয়া যে, ইণ্ডিয়া A দলৰ কোনো প্ৰশিক্ষক নাই, গতিকে গৌতম গম্ভীৰে ‘ইণ্ডিয়া A’ দলৰ সৈতে কেৱল পৰ্যালোচক হিচাপে যাব নে ভিভিএছ লক্ষ্মণে এই দলৰ প্ৰশিক্ষকৰ দায়িত্ব ল’ব সেয়া চাবলৈ আগ্ৰহী হ’ব সকলো ক্ৰিকেটপ্ৰেমী।
উল্লেখ্য যে, লক্ষ্মণ বৰ্তমান ৰাষ্ট্ৰীয় ক্ৰিকেট একাডেমীৰ ক্ৰিকেটৰ মুৰব্বী হিচাপে কৰ্মৰত। যদি গম্ভীৰ ইংলেণ্ডলৈ যায়, তেন্তে বিদেশ ভ্ৰমণত প্ৰথমবাৰৰ বাবে ‘ইণ্ডিয়া A’ৰ সৈতে ছিনিয়ৰ দলৰ প্ৰশিক্ষক উপস্থিত থাকিব।
এক তথ্য অনুসৰি, অষ্ট্ৰেলিয়া ভ্ৰমণৰ পৰা উভতি অহাৰ পিছত গৌতম গম্ভীয়ে বি চি চি আইৰ বিষয়াসকলৰ সৈতে অবিৰতভাৱে আলোচনা কৰি আছে। গম্ভীৰে নিজেই ‘ইণ্ডিয়া A’ দলৰ সৈতে ইংলেণ্ডলৈ যোৱাৰ ইচ্ছা প্ৰকাশ কৰিছে, যাতে তেওঁ ৰিজাৰ্ভ খেলুৱৈসকলৰ বিষয়েও এটা ধাৰণা ল’ব পাৰে।
ইয়াৰ বাহিৰেও গম্ভীৰে আগন্তুক ২ বছৰৰ বাবে ৰোডমেপ প্ৰস্তুত কৰিবলৈ ইতিমধ্যে আৰম্ভ কৰিছে। আচলতে অহা ২ বছৰৰ ভিতৰত বিশ্ব টেষ্ট চেম্পিয়নশ্বিপ, ২০২৬ চনৰ টি-২০ বিশ্বকাপ আৰু ২০২৭ চনৰ এদিনীয়া বিশ্বকাপও অনুষ্ঠিত হ’ব।
