১২ বছৰৰ মূৰত ভাৰত ভ্ৰমণলৈ আহিব ৱেষ্ট ইণ্ডিজ ক্ৰিকেট দল। ৱেষ্ট ইণ্ডিজ দলটোৱে অক্টোবৰ মাহত ভাৰতৰ বিৰুদ্ধে দুখন টেষ্ট মেচৰ শৃংখলা খেলিব। এই শৃংখলাৰ পিছতে ভাৰতে দক্ষিণ আফ্ৰিকাৰ বিৰুদ্ধে টেষ্ট, এদিনীয়া আৰু টি-২০ শৃংখলা খেলিব।
বিচিচিআইৰ উপ-সভাপতি ৰাজীৱ শুক্লাই কয় যে ২ অক্টোবৰৰ পৰা মোহালীত প্ৰথমখন টেষ্ট আৰু ১০ অক্টোবৰৰ পৰা কলকাতাত দ্বিতীয়খন টেষ্টত ভাৰতে ৱেষ্ট ইণ্ডিজৰ বিৰুদ্ধে খেলিব।
ৱেষ্ট ইণ্ডিজে শেষবাৰৰ বাবে ভাৰতত টেষ্ট শৃংখলা খেলিছিল ২০১৩-১৪ চনত। সেইখন আছিল শচীন টেণ্ডুলকাৰৰ অন্তিমখন আন্তঃৰাষ্ট্ৰীয় মেচ। কেৰিবিয়ান দলটোৱে শেষবাৰৰ বাবে ২০২২ চনত ভাৰত ভ্ৰমণ কৰিছিল আৰু সেইবাৰ তিনিখন এদিনীয়া আৰু সম সংখ্যক টি-২০ মেচৰ শৃংখলা খেলিছিল।
ৱেষ্ট ইণ্ডিজ শৃংখলাৰ পিছত ভাৰতে দক্ষিণ আফ্ৰিকাৰ বিৰুদ্ধে দুখন টেষ্ট, তিনিখন এদিনীয়া আৰু পাঁচখন টি-২০ মেচৰ শৃংখলা খেলিব। দক্ষিণ আফ্ৰিকাৰ বিৰুদ্ধে প্ৰথমখন টেষ্ট দিল্লীত আৰু দ্বিতীয়খন টেষ্ট গুৱাহাটীত অনুষ্ঠিত হ’ব।
উল্লেখ্য যে প্ৰথমবাৰৰ বাবে গুৱাহাটীত অনুষ্ঠিত হ’ব আন্তঃৰাষ্ট্ৰীয় টেষ্ট মেচ।
