২২ মাৰ্চৰ পৰা আৰম্ভ হোৱা আই পি এলৰ ১৮ সংখ্যক ছিজনৰ আজি দ্বিতীয়টো দিনা ক্ৰিকেট অনুৰাগীয়ে উপভোগ কৰিব পাৰিব দুখনকৈ গুৰুত্বপূৰ্ণ মেচ। দুপৰীয়া ৩.৩০ বজাৰ পৰা আৰম্ভ হ’বলগীয়া প্ৰথমখন মেচত মুখামুখি হ’ব যোৱাবাৰৰ ৰানাৰ্ছ আপ ছানৰাইজাৰ্ছ হায়দৰাবাদ আৰু ৰাজস্থান ৰয়েলছ।
হায়দৰাবাদত হ’বলগীয়া এই মেচখন ৰাজস্থান ৰয়েলছৰ বাবে অত্যন্ত গুৰুত্বপূৰ্ণ হিচাপে বিবেচিত হৈছে। ইয়াৰ মুখ্য কাৰণ ৰিয়ান পৰাগ। অসম সন্তান ৰিয়ান পৰাগৰ নেতৃত্বতে আজি হায়দৰাবাদৰ বিৰুদ্ধে খেলপথাৰত অৱতীৰ্ণ হ’ব ৰাজস্থান ৰয়েলছ।
দীৰ্ঘদিন ধৰি আঘাতৰ সমস্যাত ভুগি থকা ৰাজস্থান ৰয়েলছৰ নিয়মীয়া অধিনায়ক সঞ্জু ছেমছনৰ ঠাইত প্ৰথম তিনিখন মেচৰ বাবে ৰিয়ান পৰাগক প্ৰদান কৰা হৈছে নেতৃত্ব। দলৰ এই সিদ্ধান্ত অনুসৰি আজি প্ৰথমবাৰৰ বাবে আই পি এলত অধিনায়কৰ দায়িত্ব পালন কৰিব ৰিয়ান পৰাগে।
উল্লেখ্য যে, ঘৰুৱা ক্ৰিকেটত অসম দলক নেতৃত্ব প্ৰদান কৰাৰ অভিজ্ঞতা থকা ৰিয়ানে আই পি এলৰ দৰে বিশ্বৰ সৰ্বাধিক জনপ্ৰিয় টুৰ্ণামেণ্টত ৰাজস্থানক কিদৰে নেতৃত্ব প্ৰদান কৰে সেয়া হ’ব লক্ষ্যণীয়।
ইফালে, দিনৰ দ্বিতীয়খন মেচত মুখামুখি হ’ব চেন্নাই ছুপাৰ কিংছ আৰু মুম্বাই ইণ্ডিয়ানছ। চেন্নাইৰ এম এ চিদাম্বৰম ষ্টেডিয়ামত অনুষ্ঠিত হ’ব এই মেচখন। দুই শক্তিশালী দলৰ মাজত হ’বলগীয়া এই মেচখনৰ বাবে অধীৰ আগ্ৰহেৰে ৰৈ আছে ধোনী অনুৰাগী।
