ছ’চিয়েল মিডিয়াত ফটো আপলোড দিয়াৰ বাবে স্কুলৰ পৰা বহিষ্কাৰ হ’ল এগৰাকী তৃতীয় লিংগৰ ছাত্ৰী। একাদশ শ্ৰেণীৰ ছাত্ৰীগৰাকীক বিদ্যালয়খনৰ অধ্যক্ষই বহিষ্কাৰ কৰা ঘটনাই তীব্ৰ প্ৰতিক্ৰিয়াৰ সৃষ্টি কৰিছে অসমত।
ইতিমধ্যে, ছাত্ৰীগৰাকীৰ মাতৃয়ে মুখ্যমন্ত্ৰীলৈ পত্ৰ লিখি সমগ্ৰ ঘটনা অৱগত কৰাৰ লগতে মাতৃয়ে ‘বাল অধিকাৰ সংৰক্ষণ আয়োগ’ত অভিযোগ দাখিল কৰিছে।
এই ঘটনা গুৱাহাটীৰে এখন ব্যক্তিগত খণ্ডৰ বিদ্যালয়ত সংঘটিত হৈছে। ১৭ বছৰীয়া একাদশ শ্ৰেণীৰ ছাত্ৰীগৰাকীয়ে ছ’চিয়েল মিডিয়াত বিকিনি পিন্ধা ফটো আপলোড কৰাৰ বাবে বহিষ্কাৰ কৰিলে অধ্যক্ষই।
ঘটনা সন্দৰ্ভত বিদ্যালয়খনৰ অধ্যক্ষই জনাই যে, ছাত্ৰীগৰাকীয়ে আপলোড কৰা ফটোখনত অশ্লীলতা আছিল, যাৰ বাবে ছ’চিয়েল মিডিয়াৰ পৰা ফটোখন আঁতৰাবলৈ ছাত্ৰীগৰাকীক নিৰ্দেশ দিয়া হৈছিল আৰু ছাত্ৰীগৰাকীয়ে এই ক্ষেত্ৰত কোনো ধৰণৰ সহাৰি দিয়া নাছিল।
আনহাতে, সমগ্ৰ ঘটনা সন্দৰ্ভত ট্ৰেন্সজেণ্ডাৰ ছাত্ৰীগৰাকীয়ে সংবাদ মাধ্যমৰ সন্মুখত মন্তব্য প্ৰদান কৰিছে। ছ’চিয়েল মিডিয়াত বিকিনি পিন্ধা ছবি পোষ্ট কৰাৰ বিষয় সন্দৰ্ভত কয়, ‘৯ জুনত পৰিয়ালৰ সৈতে অৱসৰ বিনোদন কৰিবলৈ যাওঁতে ছবিখন তুলিছিলো। এই সময়ছোৱাত ছুইমিং পুলৰ ওচৰত কিছুমান ছবি তোলা হৈছিল যিবোৰ মই ইনষ্টাগ্ৰামত পোষ্ট কৰিছিলো।‘
তেওঁ লগতে কয়, ‘মই এতিয়ালৈকে মানুহৰ পৰা সন্মুখীন হোৱা প্ৰতিক্ৰিয়াৰ পৰা যথেষ্ট অসুৰক্ষিত অনুভৱ কৰিছো। মই এক মুহূৰ্তৰ বাবেও ভবা নাছিলো যে এই ছবিবোৰ ছ’চিয়েল মিডিয়াত পোষ্ট কৰাৰ পিছতে মোৰ জীৱনলৈ অন্ধকাৰ নামি আহিব।‘
ছাত্ৰীগৰাকীৰ মতে, ১০ জুনৰ নিশা প্ৰায় ৯ বজাত অধ্যক্ষই ফোন কৰিছিল আৰু তেওঁ গালি পাৰিবলৈ আৰম্ভ কৰিছিল। ছাত্ৰীগৰাকীয়ে কয়, ‘মই বৰ নাৰ্ভাছ অনুভৱ কৰিছিলো। মই ফোনটো মোৰ মাক দিছিলো। ফোনটো স্পীকাৰত আছিল আৰু অধ্যক্ষই কৈছিল যে মই নিৰ্লজ্জ আৰু ঘৃণনীয়। এই দুটা শব্দ এতিয়াও মোৰ কাণত বাজি আছে। কাৰণ এই শব্দবোৰ এজন অশিক্ষিত বা সাধাৰণ ব্যক্তিৰ পৰা নাছিল। মোৰ বিদ্যালয়ৰ অধ্যক্ষৰ মুখৰ পৰা অহা এই শব্দ দুটাই মোক মানসিকভাৱে দুৰ্বল কৰি পেলাইছে।‘
ইফালে, সমগ্ৰ ঘটনা সন্দৰ্ভত মাতৃয়ে অসন্তুষ্টি প্ৰকাশ কৰি কৈছিল যে অধ্যক্ষই আলোকচিত্ৰসমূহত আপত্তি কৰিছিল আৰু ছবিবোৰৰ বাবে ‘অৰ্ধ-নগ্ন’ৰ দৰে শব্দ ব্যৱহাৰ কৰিছিল। মাতৃয়ে বহুবাৰ অনুৰোধ কৰাত অধ্যক্ষই তিনিটা চৰ্ত ৰাখিছিল। ট্ৰেন্সজেণ্ডাৰ সম্প্ৰদায় এৰিব লাগিব, শৰীৰৰ টেটু আঁতৰাব লাগিব আৰু মনোৰোগ বিশেষজ্ঞৰ পৰা পৰামৰ্শ ল’ব লাগিব বুলি অধ্যক্ষই মাতৃক জনাইছিল।
এই সমগ্ৰ ঘটনাৰ শুনানি গ্ৰহণ কৰি থকা অসম ৰাজ্যিক শিশু অধিকাৰ সুৰক্ষা আয়োগৰ অধ্যক্ষ শ্যামল শ্বেৰাই কয়, ‘ট্ৰেন্সজেণ্ডাৰ ছাত্ৰীগৰাকীৰ অভিভাৱকে ২৬ জুনত এটা অভিযোগ লৈ আয়োগলৈ আহিছিল। ভুক্তভোগীৰ পৰিয়ালৰ পক্ষৰ পিছত এতিয়া বিদ্যালয় পক্ষৰ কথাও শুনা যাব আৰু যদি ছাত্ৰীগৰাকীৰ বিৰুদ্ধে বৈষম্যমূলক আচৰণ কৰা হৈছে তেন্তে পৰৱৰ্তীসময়ত আইনী ব্যৱস্থা লোৱা হ’ব।‘
