ধন সৰবৰাহৰ গোচৰত দিল্লী উচ্চ ন্যায়ালয়ৰ ন্যায়াধীশ যশৱন্ত বাৰ্মাৰ বিৰুদ্ধে FIR দাখিল কৰিব লাগে বুলি কৰা আবেদনৰ শুনানি গ্ৰহণ কৰিবলৈ অস্বীকাৰ কৰে উচ্চতম ন্যায়ালয়ে। আদালতে স্পষ্ট কৰি দিয়ে যে বিষয়টো আভ্যন্তৰীণ সমিতিৰ দ্বাৰা তদন্ত চলি আছে আৰু প্ৰতিবেদন লাভ কৰাৰ পিছত দেশৰ মুখ্য ন্যায়াধীশৰ হাতত প্ৰয়োজনীয় ব্যৱস্থা গ্ৰহণৰ বাবে বহু বিকল্প উপলব্ধ হ’ব, সেয়েহে এই আবেদনখন বিবেচনা কৰাটো উপযুক্ত বুলি বিবেচিত হোৱা নাছিল।
উল্লেখ্য যে, বিচাৰপতি যশৱন্ত বাৰ্মাৰ আবাসত যোৱা ১৪ মাৰ্চৰ নিশা অবিশ্বাস্য পৰিমাণৰ ধন উদ্ধাৰক লৈ দেশজুৰি তুমুল আলোড়ণৰ সূচনা হৈছিল।
চাঞ্চল্যকৰ এই ঘটনাৰ পাছতে সৰ্বোচ্চ ন্যায়ালয়ে গঠন কৰিছিল ইন-হাউচ তদন্ত কমিটি। ইফালে, এই ঘটনা পোহৰলৈ অহাৰ পিছতো বিচাৰপতি বাৰ্মাৰ বিৰুদ্ধে কিয় গোচৰ ৰুজু হোৱা নাই সেই সন্দৰ্ভত প্ৰশ্ন তুলি আইনজীৱী মেথেউজ নেদুমপাৰাই সৰ্বোচ্চ ন্যায়ালয়ত এক আবেদন দাখিল কৰিছিল।
ন্যায়াধীশ অভয় এছ ওকা আৰু ন্যায়াধীশ উজ্জ্বল ভূঞাৰে গঠিত খণ্ড বিচাৰপীঠে আইনজীৱী মেথেউজ নেদুমপাৰাই দাখিল কৰা আবেদন খাৰিজ কৰে আৰু ইন-হাউচ তদন্ত কমিটিৰ প্ৰতিবেদন লাভ কৰাৰ পিছতহে পৰৱৰ্তী পদক্ষেপ গ্ৰহণ কৰা হ’ব বুলি সদৰী কৰে।
