১১ কোটি দৰমহা পোৱা এজন ৰাষ্ট্ৰপতি। বিশ্বৰ ধনী নেতাৰ তালিকাত প্ৰথমে নাম আহে ৰাষ্ট্ৰপতিজনৰ। নিজৰ আদৱ-কায়দাৰে বা দেশখনৰ আৰ্থিক অৱস্থাৰ উন্নয়নৰ বাবে বিশ্বৰ ভিতৰতে এখন শক্তিশালী দেশৰ ৰাষ্ট্ৰপতি তেওঁ। ভাৰতৰ সৈতেও ৰাষ্ট্ৰপতিজনৰ পূৰ্বৰে পৰা এক বন্ধুত্ব সুলভ সম্পৰ্ক আছে।
তেওঁ হৈছে ৰাছিয়াৰ ৰাষ্ট্ৰপতি ভ্লাদিমিৰ পুটিন । পুটিনক বিশ্বৰ আটাইতকৈ ধনী নেতাসকলৰ ভিতৰত গণ্য কৰা হয়। কিয়নো পুটিনে বছৰি ১৪,০০০ ডলাৰ (ভাৰতীয় টকাৰ হিচাপত প্ৰায় ১১.৭ কোটি) দৰমহা লাভ কৰে। ২০০ বিলিয়ন ডলাৰ (১৬ লাখ কোটি টকা) সম্পত্তিৰ গৰাকী ৰাষ্ট্ৰপতিজন।
বিৰোধী নেতাৰ মতে, পুটিনৰ এটা বিলাসী প্ৰাসাদসদৃশ ঘৰ আছে। যিটো কৃষ্ণ সাগৰৰ পাৰত ১,৯০,০০০ বৰ্গফুটত নিৰ্মাণ কৰা হৈছে। বাংলোটোৰ মূল্য ১ বিলিয়ন আমেৰিকান ডলাৰ বুলি অনুমান কৰা হৈছে। পুটিনৰ এই ৰাজকীয় ঘৰটোত এটা ভূগৰ্ভস্থ বাংকাৰো আছে।
ইয়াৰ উপৰি পুল, জিম, চিনেমা হলৰ দৰে সুবিধাও আছে। পুটিনৰ ওচৰত কমেও ১৯ টা ঘৰ আছে। তেওঁৰ ৭০০ খন বাহন, ১২ খন ব্যক্তিগত জেট আৰু হেলিকপ্টাৰ আছে। অৱশ্যে, আনুষ্ঠানিকভাৱে পুটিনৰ নামত মাত্ৰ ৮০০ বৰ্গফুটৰ এপাৰ্টমেণ্ট, এটা ট্ৰেইলাৰ আৰু তিনিখন গাড়ী আছে।
তথ্য অনুসৰি, ভ্লাদিমিৰ পুটিনে বেছিভাগ তেওঁৰ ব্যক্তিগত ৰে’লৰ দ্বাৰা ভ্ৰমণ কৰিবলৈ ভাল পায়। যাক ‘ঘোষ্ট ট্ৰেইন’ বুলি কোৱা হয়। ২২ কোচৰ ৰে’লখন সম্পূৰ্ণৰূপে বুলেট প্ৰুফ। আনকি ইয়াৰ দুৱাৰ আৰু খিৰিকীবোৰ বুলেটপ্ৰুফ।
ফাইনেন্সিয়েল এক্সপ্ৰেছৰ এক প্ৰতিবেদন অনুসৰি, ৰে’লখনত সাত তাৰকা হোটেলৰ দৰে সুবিধা আছে। ইয়াত বিলাসী শোৱনি কোঠা, ডাইনিং ৰুম, চিনেমা থিয়েটাৰ আদিৰ দৰে সুবিধা আছে।
ইয়াত আধুনিক জিম, পাৰ্লাৰৰ সুবিধা আছে। ৰে’লখনৰ দুটা ডবাত চিকিৎসালয়ৰ সুবিধা আছে। য’ত অস্ত্ৰোপচাৰৰ সুবিধা আছে। এই ৰে’লখনৰ ব্যয় আছিল ৭৪ নিযুত ডলাৰ। ইয়াৰ উপৰি, ৰে’লখনৰ তত্বাৱধানত প্ৰতি বছৰে প্ৰায় ১৫.৮ নিযুত ডলাৰ ব্যয় কৰা হয়।
