গাজাৰ ওপৰত আক্ৰমণ অব্যাহত ৰখা ইজৰাইল সোমাই পৰিছে আন এক বিতৰ্কত। এইবাৰ ব্ৰিটিছৰ দুগৰাকী সাংসদক দেশখনত প্ৰৱেশ কৰিব নিদিয়া ঘটনাক লৈ সমালোচনাৰ সন্মুখীন হৈছে ইজৰাইল। দুয়োগৰাকী সাংসদক বিমান বন্দৰৰ পৰাই আটক কৰিছে ইজৰাইল প্ৰশাসনে।
ঘটনাৰ প্ৰতিক্ৰিয়া প্ৰকাশ কৰি ব্ৰিটিছ বিদেশ মন্ত্ৰী ডেভিদ লেমীয়ে কয় যে ব্ৰিটিছ সাংসদৰ লগতে এনেধৰণৰ ব্যৱহাৰ কৰিব নালাগিছিল।
উল্লেখ্য যে, লেবাৰ পাৰ্টীৰ সদস্য তথা সাংসদ য়ুআন য়ং আৰু অবতিছাম মহম্মদ আহিছিল ইজৰাইললৈ। ইজৰাইল প্ৰশাসনে তেওঁলোকৰ বিৰুদ্ধে ঘৃণা বিয়পোৱা আৰু নিৰাপত্তা বাহিনীৰ কাৰ্যকলাপৰ ‘নথিভুক্ত’ কৰাৰ পৰিকল্পনাৰ অভিযোগ তুলি দেশখনত প্ৰৱেশ কৰাত বাধা আৰোপ কৰে।
এই ঘটনাক লৈ ব্ৰিটিছ বৈদেশিক মন্ত্ৰী ডেভিদ লেমীয়ে তীব্ৰ প্ৰতিক্ৰিয়া প্ৰকাশ কৰি কয় যে এয়া ব্ৰিটিছ সাংসদৰ প্ৰতি অন্যায়। তেওঁ কয়, ‘আমি ইজৰাইল চৰকাৰক এই বিষয়ত আমাৰ স্থিতি স্পষ্ট কৰিছো আৰু দুয়োজন সাংসদৰ সৈতে গোটেই নিশা যোগাযোগ কৰি তেওঁলোকক সমৰ্থন আগবঢ়াইছো।’
উল্লেখ্য যে, এই বিষয় সন্দৰ্ভত ইজৰাইল চৰকাৰৰ সৈতে ব্ৰিটিছ চৰকাৰৰ অহৰহ যোগাযোগ হৈ আছে। এই ঘটনাৰ পিছত দুয়োখন দেশৰ মাজৰ সম্পৰ্কত প্ৰভাৱ পৰাৰ সম্ভাৱনা আছে যদিও শীঘ্ৰে ইয়াৰ সমাধান হ’ব বুলিও আশা কৰা হৈছে।
